La Usc di Ladins

La scontrèda endrezèda dal Istitut Cultural Ladin de Fascia ai 6 de jugn dal titol »Cie é pa n standard te n lingaz? Storia, endesfides, aspetatives y davegnì dl ladin« é stata de gran enteres e l’à endò uzà fora la emportanza e la endesfida de n lengaz unitar, n projet che é nasciù ti prumes egn ’80 e che te chisc ultimes 20 egn é jit a se perder. Nos aon volù n saer de più e aon rejonà con Fabio Chiocchetti stat per passa 40 egn diretor del Istitut.

 

Con la scontrèda endrezèda dal ICL se èl moet via endodanef l enteres dintornvìa l ladin dolomitan?

Fabio Chiocchetti Dantfora volesse dir che son stat n muie content e é aprijià la scontrada endrezada dal Istitut Cultural Ladin che l é segur n segnal de n nef enteres sun chest tem. Son a una con l professor Paul Videsott che l pont zentral de la giornada l é stat l intervent del Diretor de la Intendenza e Cultura Ladina de la Provinzia de Busan André Comploi che à dit che ades fosse i tempes madures per tor demez chela limitazion fata con la norma provinziala del Südtirol del 2003 su la doura del ladin, demò badiot e gherdena, te l’aministrazion. Te sala l era n bel publich con desvalives joegn, più che auter ‘addetti ai lavori’; dut un l segnal l é chel de na convergenza de le istituzion ladine su la ipotesa de averjer endodanef l descors sul ladin standard. No sé dapò coche la sarà la responeta anter la jent, segur do 20 egn l é mudà l mondo.

L é mudà trop te chisc egn, se se peissa che dai prumes descorsc de standardisazion del ladin l é passà 40 egn. Co éla nasciuda enlouta la spenta per n ladin unitar?

Dut l é nasciù concretamenter del 1988 canche ge é stat dat su a Heinrich Schmid l’enciaria per l’elaborazion de n lengaz scrit unitar sul ejempie del Rumanc Grijon. Ma jà inant noi vardaane coche luraa i Rumances en cont de chest: del 1982 l era jà vegnù fora i »lineamenc« de Schmid e sobito aveane fat na recenjion sun Mondo Ladino. Enlouta la standardisazion di picoi lengac l era n tem de atualità tel contest de le mendranze, se moea ence l Friul e la Sardegna per l’elaborazion de n codesc de scritura unitar. Del ’84 vegnia metù su la Lelinami (Lega per le lingue della nazionalità minoritarie del Stat talian), per la fondazion siane jic ju a Roma gio e Ilda Pizzinini rechia, e del ’88 aon endrezà proprio te Istitut l quarto convegn de la Lelinami, apontin sun chest argoment, en ocajion di 40 egn de la Costituzion taliana. En chel dì l era entervegnù Lois Craffonara a rejonar de la situazion del ladin dolomitan a confront col Rumantsch e l aea dit che ence noi ladins assane cognù ge jir do a chel troi e che l model di Grijogn l era chel che passenaa de più per la realtà ladina. Te chela ocajion l era vegnù fora apontin l’idea de ge dar su a Schmid l’enciaria ofiziala.  

Duta l'intervista su La Usc stampèda de en vender ai 27 de jugn del 2025.  (Monica Cigolla)