La Usc di Ladins

Engaissèr i joegn fascegn a se dèr ju con studies che posse didèr a miorèr la cognoscenza e l svilup de sia comunanza. Con chest obietif tel an 2019 l Comun General de Fascia à metù su la scomenzadiva »N pest per nesc studenc«. Aldò del regolament aproà enlouta, ai prumes de jugn l Consei de Procura del Comun General de Fascia l à  metù fora ence chest an l avis de concors »N pest per nesc studenc 2024«.

Per chest concors l Comun General met a la leta 4000 euro da destinèr a tesi de laurea e tesi de dotorat dintornvia argomenc leé a l’economia, la cultura, l’enrescida, la scienza e la tecnologies che revèrda l teritorie e la comunanza de Fascia.

Più avisa l é pervedù doi pesć da 500 euro vigniun resservé a tesi de laurea de trei egn, doi pesć de 1000 euro vigniun resservé a tesi de laurea magistrèla e un de 1000 euro resservà a tesi de dotorat da poder ge dèr fora ai studenc enciasé te Fascia che à ciapà l titol tel an 2024.

La domana de amiscion al concors cogn vegnir manèda ite, aldò de la modalitèdes pervedudes, al più tèrt ai 25 de aost al Servije de Canzelaria del Comun General de Fascia a Sèn Jan, per posta o a man o, per chi che à na direzion de posta eletronica zertifichèda personèla, demò a la direzion PEC del Comun General de Fascia: pec.cgf@pec.comungeneraldefascia.tn.it

No vegnarà tout en concidrazion domanes che rua ite do l termin (se les vegn manèdes per posta ge vel tegnir cont di tempes de spedizion) o tras direzions de posta eletronica no zertifichèda o con modalitèdes desferentes.

L avis entriech e i formulères é da poder troèr sul albo e su la piata internet istituzionèla del Comun General de Fascia www.comungeneraldefascia.tn.it.

 (LG)