La Usc di Ladins

Ai 8 de aost del 2015 i Scizeres de Fascia era sa le Sele a portèr su e benedir na crousc en recort de duc i Standschützen, volontadives joegn e veies, che de mé del 1915 é jic a defener l front de la vera sun usc de cèsa. L event fajea pèrt de n projet più gran dal inom ‘An der Front’, metù en esser da duc i scizeres del Tirol storich. Chest projet pervedea che sun duta la linea del front de la Gran Vera vegne pojà 74 croujes de fer a recort de duc i stonc. Sul teren de Fascia i era trei i lesc olà pojèr chesta croujes: Porta Vescovo (assegnà ai Scizeres de Fodom), Ponta Penìa olache col didament de Aurelio Soraruf l é stat metù na tabela de comemorazion e Pas de le Sele, pont n muie strategich dal pont de veduda de la vera: chiò l’armèda talièna à proà più outes a sbreghèr ite l front per ruèr te Fascia.

Ai 12 de messèl del 2025 i Scizeres de Fascia era endodanef sa le Sele a recordèr i 10 egn da canche l é stat metù su la crousc. »La Schützenkompanie Ladins de Fasha l’à envià la Compagnies di Scizeres de Nauders e de Pfunds da l’Austria, chela de Stanecia, con chela che sion jomeliné – ne à contà l Oberleutnant Max Strada – e apede l era ence raprejentanc de la Compagnies de Ried, de Graun, de Ciastelrot, de Jenesien e de Fiem. Chi a pe, chi con l impiant portamont e chi coi mesi, sion jic duc fin sa le Sele per la zerimonia.«

Se pel lejer dut su La Usc nr 27 dai 18 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.



 (Monica Cigolla)