La Usc di Ladins

Tel Consei General dai 28 de messèl l ‘Grop Mescedà’, per ousc de la conseiera Mirella Florian, à portà dant na proponeta de mozion domanan che vegne dat l’adejion al apel ‘Salviamo Gaza ora, fermiamo il massacro’ metù fora dal Comun de Trent dessema a l’Arcidiocesi e a le Acli, coi obietives de domanèr sobito n intervent del Goern talian con na azion diplomatica per meter fin a chesta vera e violenzes, respetèr l derit internazionèl e la protezion de la jent zivila, ativèr la liberazion di prejonieres te man de Hamas, fermèr l comerz de èrmes con Israel e fèr prescion sul Goern israelian percheche l lasce jir ite te la Striscia de Gaza i aiuc umanitères. Te la mozion vegn amò domanà che vegne palesà la vejinanza e la solidarietà de Fascia a la popolazion che padesc tras scomenzadives de sensibilisazion e informazion.

La presidenta Dezulian à dit che pel vegnir fat n intervent de sensibilisazion ma, aldò del regolament, la proponeta de mozion no pel vegnir touta dant dal Consei, ajache la mozions cogn ruèr ite per scrit ti tempes pervedui. L procurador Felicetti à azetà de ge manèr la proponeta ai Comuns de Fascia acioche i posse sotscriver l apel e ai 30 e 31 de messèl l apel per Gaza l é stat aproà dai Consees de Comun de Sèn Jan e de Moena, con la speranza che ence i etres Comuns e l Comun General posse fèr medemo te sia pruma sentèdes.

De più su La Usc stampèda.

 (Lucia Gross)