La Usc di Ladins

»L era i prumes egn che se rejonèa de la Soreghina, de chesta neva ambasciadora, ma l’emportanza che l’à abù per Marcialonga se l’à sentuda sobito« coscita la conta Carlotta Nemela, la pruma Soreghina litèda del 2001 canche i dirigenc de Marcialonga à pissà de tor ite n auter element tel staff del Comitat e coscita l é stat pissà a na fegura de na ela che cognea doventèr l simbol de la garejèda de paslonch più cognosciuda e aprijièda del mond. Te chela ocajion l era stat tout ca la veiora contia de la ‘Figlia del Sol’ e ge era stat dat inom apontin Soreghina.
Te na sera de litazion de gran partezipazion, la fascèna da Ciampedel Carlotta Nemela é stata cernuda desche pioniera Soreghina de Marcialonga.
Aldidanché, desche enlouta, volontadives e staff de Marcialonga fèsc sentir la Soreghina benvoluda e pèrt de na gran familia. Per cheles che à l met de corir chesta encèria l’esperienza se desmostra unica e bona de fèr doventèr più rica la vita de ogneuna a na vida spezièla.
L Comitat l é vertech a tor dant la neva Soreghina che vegn litèda en sabeda ai 9 de aost tel event endrezà a La Gran Ciasa de Soraga.

Se pel lejer dut su La Usc nr 29 dal prum de aost: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (MCI)