La Usc di Ladins

Na ocajion de sport ma soraldut de amicizia e de testimonianza de la fe. La partida de balon anter la Nazionèla Talièna Monies e la ex jiadores del Fascia Balon sul ciamp de Cianacei l é stat n bel moment de agregazion. Canche la squadra de monies à responet al envit de la Comiscion per la cultura de la parochies de Fascia de vegnir te Fascia, sobito se à pissà che fossa stat bel endrezèr ence na partida de balon, ma ge volea meter ensema na squadra de jiadores eles. L’encèria de contatèr la ex jiadores del Fascia Balon la é stata touta su con gaissa da Monica Desilvestro che te cater e cater ot l’à binà ensema n grop de eles con la pascion del balon. I dis dant del apuntament sportif les se à troà per fèr vèlch alenament e coscita les é ruèdes sul ciamp bela ciareèdes e pienes de energia, no se dijessa nia deldut che les à lascià ló da n trat de jièr a balon. Dant de tachèr ite la partida don Mario Bravin ge à dat la benediscion e dapò les à tacà a corer, da na man e da l’autra del ciamp, controlèdes dal arbiter Davide Baldrati.

La ex jiadores del Fascia Balon fèsc squadra

La eles fascènes che à jia a balon l é: Elisa Depaul, Monica Desilvestro, Margherita Giacomuzzi, Melissa Locatin, Martina Menegoni, Giulia Pellegrin, Claudia Rasom, Ingrid Volcan, Martina Volcan e Caterina Zulian.
»L é stat bel se troar do n muie de temp -à dit Monica Desilvestro - l é jent che desche me no veit n balon da diesc egn, ma sorafora la partida che aon tout dant sportivamenter, se aon grignà n muie. L é stat bel ence jir a cena dute ensema, se aon baratà esperienze de vita, aon descorì n mondo nef, aon creà n ambient bel, de amicizia. Noi ades seghiton a se troar na uta en setemana e aon tout ite ence doi persone neve che sul moment no me era vegnù tel ciaf de chiamar ma che le aea jà jià con noi.

De più su La Usc stampèda de en vender ai 8 de aost del 2025  (Monica Cigolla)