La Usc di Ladins

»La musega e l ciantèr é bogn de trasmeter sensazions uniches, bones de tocèr tel fon de l’ènema e didèr a smendrèr mingol l padiment leà al recort de chel che l é sozedù acà 40 egn e al recort de chi che no l é più. N conzert straordenèr che restarà al lonch te la memoria e tel cher de duc chi che era te gejia de Sènt Eliseo en domenia ai 20 de messèl.« L é i pensieres robé da la piata Facebook de la Fondazion Stava 1985 che à endrezà l ‘Conzert per Stava’ en ocajion di 40 egn da la tragedia. N conzert portà dant dal Ensemble Canticum Novum da Moena e l Ensemble strumental Pentagramma che é stat coscita tant aprijià che l vegnarà portarà dant amò te trei seres. Se trata del Requiem de John Rutter con apede etres toc per cor e strumenc. La museghes é de Dimitri Bortnyansky, Anton Bruckner, Nicolai Kedrov, Ivan Marini, Josef G. Rheinberger e Ilario Defrancesco, Maester del Ensemble Canticum Novum.

»L conzert che aon endrezà per l cedean de Stava à domanà n gran laor – ne à dit l Maester Defrancesco – e per chest se aon empensà che fossa stat n pecià l lasciar ló e no l propor più con le repliche. Coscita aon domanà te le gejie più grane percheche coi strumenc se dora più post, aon pissà a chela de Moena, chela de Cianacé e chela de Ciavales. En dut sion passa 50 corisć, noi del Canticum con 20 jonté int da Fiem e da Fascia. Apede al cor l é na formazion particolara con 7 strumenc: l’arpa, l orghen portatif che fossa n orghen da cambra che na oita i dorava ence per le messe picole, l flaut, l oboe, l violoncel e le percuscion. I strumentisć l é ensegnanc de la Scola de Musega Il Pentagramma.
Chest istà donca portaron dant amò trei conzerc, ai 11 de aost da les 21:00 te la gejia parochiala de Moena, ai 13 de aost te chela de Ciavales e ai 18 te la gejia de Cianacei.«

De più su La Usc stampèda de en vender ai 8 de aost del 2025

 (Monica Cigolla)