La Usc di Ladins

Picoi lengac, gran musega
Va inant l rich program del Panorama Music de Fascia, con conzerc da sera a La Grenz e de dì sa mont
La é peèda via con gran suzes la X edizion del Val di Fassa Panorama Music, che sporc na lingia de conzerc, tant a l’averta ti lesc panoramics sa mont o ti pre apede a mèlghes e refuges che da sera tel Music Club La Grenz de Moena: posć olache se pel apede sorì coi impianc o ence a pe.
La rassegna, metuda a jir da la sociazion de cultura e musega La Grenz de Moena con la direzion artistica de Enrico Tommasini à realisà ence l projet »Lengac de mendranza, musega èrt e letradura« sostegnù da Region Trentin-Südtirol, Provinzia de Trent, Comun General de Fascia e Comun de Moena, resservà a gropes e musizisć da la Ladinia, da la Catalunya, da la Sardegna, dal Friul e dal Südtirol.
Chisc i apuntamenc en program
en sabeda ai 2 de aost da les 21:30 al Music Club La Grenz e en domenia ai 3 da les 11:30 sun Ciampac cianzon d’autora catalana da le Baleari con Mar Grimalt e Carles Madina Estelrich
en sabeda ai 9 de aost da les 21:30 a La Grenz cianzon d’autora da la Sardegna con Giorgia Gangui e Silvanjo Valci
en sabeda ai 23 de aost da les 21:30 a La Grenz e en domenia ai 24 da les 11:30 sun Ciampedie musega soul, blues e funk con Evi Mair & Friends dal Südtirol con Matteo Rossetto, Michele Casciaro, Michele Bazza­nella e Thomas Heiny
en sabeda ai 30 de aost da les 21:00 al teater Navalge de Moena l straordenèr projet afro-balkan-alpen-jazz de Michael Lösch con la Sweet Alp Orchestra
en sabeda ai 6 de setember da les 21:30 a La Grenz e en domenia ai 7 da les 11:30 al Agritur El Mas a Moena l Quartet jazz con Pietro Tonolo, Giovanni Giorgi, Caterina Crucitti e Paolo Birro.
I conzerc é duc debant, l program é su Facebook e Instagram Val di Fassa Panorama Music e sul sit fassa.com.

Ta Mont l é endò festa!
Ai 2 e 3 de aost organisadores e volontadives ve speta te Val de Sèn Nicolò a Poza
La é ruada a la 18ª edizion, la festa che ence chest an ve speta te la Mont de Poza con 20 stonc gestii da le sociazion de volontariat per ve sporjer de bona magnadiva, piac de la tradizion e douces golousc, ma ence jeghes e entrategni­ment per picoi e gregn: la tele­­ferica, l saut tel fegn, labo­ra­tories de jogolaria e auter. E no menciarà musega e legreza sun dut l percors.
Chesta festa à ence aten­zion per la cultura e ogne an vegn cernù n argoment: chest’outa vegn portà dant l tema del mudament, tras na esposizion che conta de coche la natura, la cultura ladina, la musega e la cojina se à mudà tel temp. Testimonianze de la jent del post e veies retrac, per ve sporjer na esperienza autentica che tocia l cher. Le grignade e la gaissa di volonta­dives, enveze, resta semper medeme, per ve secodir con amor.
Se pel ruar ite a pe da desvali­ves troes (varda www.festatamont.it) ence compagné dai menacrepes (enscinuazion ti ofizies Check­point). L é ence n servije de trasport da Vidor fin te Sauch, l pea via da le 9:00 da doman e l fenesc da le 18:30.
L program
En sabeda e domenia ai 2 e 3 de aost da le 10:00 verc le tieje e scomenza i jeghes, da le 11:30 se taca a dar fora da marena. L é laboratories e atività, su enscinuazion ence Yoga tel bosch. Da le 15:00 ló da Bambi, Michela lec contie per i picoi e la festa va inant fin le 18:00.
En sabeda da le 11:30 te Mesaselva l é l’inaugurazion de la mostra fotografica coi Popcorner e da le 14:00 l Circen Dolomites Festival fasc la Dolomitic Highline, tra­versada de la Val de Sèn Nicolò sul filtrat en aut.
En domenia da le 11.00 vegn dit la messa te la capela Madonna delle Vette te Mesaselva e da le 14:00 tel Circen Dolomites Fes­tival i jogolieres de Circensema fasc l spetacol SunSom.
Ve speton duc con gaissa e legreza!

Nuovo Cinema Dolomiti
Na lingia de proiezions debant a Pardac sui temes del ambient per endrez del MUSE con sie Museo geologich de Fiem
L MUSE, con sie Museo geologich de Pardac, adum con l Trento Film Festival e l Comun de Pardac, sporc na lingia de proiezions con entrèda ledia e debant per vardèr, cognoscer e entener l raport anter om e natura da desferenc ponts de veduda, vejins e più dalonc tel temp e ti lesc.
La proiezions vegn metudes a jir vegni jebia del meis de aost, da les 21:00 tel Cinema teater de Pardac.
Ai 7 de aost l é l film ‘Donde los arboles dan carne’ che à venciù la Genziana d’arjent al Trento Film Festival. L regist argentin Alexis Franco conta la storia de n arlevador che con sia familia cogn scombater contra problemes e dejastres di evenc naturèi; rejona l critich cinematografich Miro Forti.
Ai 14 de aost vegn moscià ‘Svalbard: Silent Games’ de Francesco Biscaglia; ai 21 ‘La Casa Rossa’ de Francesco Catarinolo che ne mena te la Groenlandia, col intervent de Matilde Peterlini del MUSE e ai 28 ‘Apple Cider Vinager’ de Sofie Benoot, col coment de Riccardo Tomasoni del Muse. Info su www.muse.it

Maria de Val tl MusLa
Le Museum Ladin inviëia al conzert de Maria de Val, en mertesc ai 5 d’agost dales 20:00, tl MusLa Ciastel de Tor a San Martin
Maria Moling presentëia so album de debüt dal titul »Mëda Medusa«, cun chël che ara afascinëia le publich sciöche polistromentalista y bona ciantarina cun toc por inglesc, ladin, talian y todësch. Süa musiga moscëda le folk indian cun influsc talians y sudamericans: la usc tipica de Maria Moling, consciüda dal grup Ganes y »Me + Marie«, ciafa por le pröm iade na süa lerch te n contest daldöt personal. N proiet musical bun da cunté n univers sensibl cun na odlada artistica sota y delicata.
Maria cianta en trio adöm a Anna Emmers­berger y Chris Costa. L’entrada é debann. Deplü informaziuns ciafon ala mail info@museumladin.it o al 0474 524020. Sce al foss bur’ tëmp, vëgn le conzert tigní tl salf dl Istitut Ladin »Micurá de Rü«.

1 cil, 3 lingac, 1000 stëres
Le Museum Ladin inviëia ala manifestaziun »1 n cil, 3 lingac, 1000 stëres« en sabeda, ai 2 d’agost dales 20:30, tl MusLa Ciastel de Tor
Al vëgn lit tesć fora dl proiet »Idioms zelesć«, nasciü por propone n lian danter le cil y la tera, fat de parores di idoms locai y dialetai. N valgügn ogec dl cil, saurisc da osservé ince zënza l’aiüt dl telescop, gnará descric por talian, todësch y ladin. 
Dedô podaran ti ciaré al firma­mënt y a döta süa morvëia cun le telescop. Cun David Gruber (diretur Museum Natöra Südtirol), Sabrina Bernhard (colaboradëssa Museum Natöra Südtirol) y Francesca Limi­roli (Gruppo Astrofili Fiemme).
L’entrada é debann, an mëss indere s’anunzié, al 0474 524020 o ala e-mail prenotaziuns@museum ladin.it . Al pó tó pert max. 25 par­te­zipanc/tes.

Presentaziun dl liber »L itiosaur dl Secëda«
Le Museum Ladin inviëia ala presentaziun dl liber »L Itiosaur dl Secëda« de Claudia Urthaler y Sara Welponer, publiché dal Istitut Ladin Micurá de Rü y dal Museum Gherdëina
La presentaziun é en mercui, ai 6 d’agost dales 17:00, tl MusLa Ursus ladinicus a San Ciascian, en colaboraziun cun l’Istitut Ladin Micurá de Rü. Le liber cunta la storia de dui compagns che é saltá por caje te n »valgugn osc«, tratan na escurjiun sö por les pares dl Secëda. 
Defata ái capí che ara se tratâ de reperc de n itiosaur bëgn 8 metri lunch che nodâ dan da 241 miliuns de agn fora por l’ozean dla Tetida. Sara Welponer y Claudia Urthaler presentëia le liber sön chësc tier por talian y todësch. Ala fin él preodü n laboratore creatif por mitans y mituns dai 6 ai 10 agn, cun les auturies.
L’entrada é debann. Deplü informaziuns ciafon por e–mail ala misciun info@museumladin.it o al numer de telefon 0474 524020.

Le museum SÖN le ce
Le Museum Ladin inviëia al laboratore creatif »Le museum SÖN le ce«, en mertesc ai 5 d’agost, dales 10:00 ales 11:30 tl MusLa Ciastel de Tor a San Martin de Tor
Adöm esplorunse le ciastel por fá spo n iade imaginar ti ogec metüs fora y cherié nosc museum da condüje a ciasa… SÖL ce. 
Le laboratore é por mitans y mituns dai 4 ai 8 agn. Le cost de partezipaziun é de 5,00 € a ce. Tó pert pó max. 15 mitans/uns. 
I periun do na prenotaziun ala mail prenotaziuns@museumladin.it o al numer de telefon 0474 524020.

Musiga da 5 Paisc europeics
Festival Badiamusica: Theresa Heidler sona en lönesc ai 4 d’agost dales 21:00 sön l’orghe dla dlijia de Badia 
»Music from 5 european countries – from Sweelinck to Bach«, é le titul dl conzert, che le Festival Badiamusica pîta en lönesc ai 4 d’agost dales 21:00, te dlijia de Badia. 
Sön l’orghe sarál da aldí la jona Theresa Heidler da Leipzig, che porta dant operes de componisć da 5 Paisc europeics: plü avisa de Johann Sebastian Bach (Germania), Louis Marchand (Francia), Jan Peterszoon Sweelinck (Olanda), Johann Kaspar Kerll (Germania), Michelangelo Rossi (Talia) y Pablo Bruna (Spagna). 
Al é döt componisć che á vit danter le 16. y 17. secul.

Iade musical tl’America
Festival Badiamusica: ai 9 d’agost dales 21:00 él te Ciasa dla Cultura a La Ila n conzert cun l’ensemble »Windkraft«
»Once upon a music in America«, é le titul dl conzert che le Festival Badiamusica pîta en sabeda ai 9 d’agost dales 21:00, tla Ciasa dla Cultura a La Ila. Protagonist é le »Windkraft Ensemble« cun Antionio Aiello y Luca Falasca ala vidora, Luigi Azzolini ala viola, Leonardo Sapere al violoncello y Roberto Gander al clarinet. Chësta sëra vëgnel sorví n iade afascinant fora por le monn sonor dl’America. Cun toc de Luis Enrique Bacalov, Leonard Bernstein, Nino Rota, Ennio Morricone, John Williams y Leroy Anderson, coliëia chësc conzert musiga da film, l’energia de Broadway y toc orchestrai. Viede na esperiënza de incherscimun, pasciun y melodies zënza tëmp, olache musiga y naraziun se incrujëia.

Re Laurin y le Ciadenac
Ai 7 d’agost vëgnel presenté a San Martin le liber de Ulrike Kindl »Kritische Lektüre der Dolomitensagen von Karl Felix Wolff – Band III: König Laurin und sein Rosengarten«
L’Istitut Ladin Micurá de Rü á le plajëi da invié ala presentaziun dl liber de Ulrike Kindl »Kritische Lektüre der Dolomitensagen von Karl Felix Wolff – Band III: König Laurin und sein Rosengarten«.
La presentaziun vëgn tignida en jöbia ai 7 d’agost dales 18:00, tl salf dl Istitut Ladin a San Martin de Tor. Do i salüc da pert dla presidënta dl Istitut Lara Moroder y dl assessur ladin Daniel Alfreider, él la prof. Kindl che presentëia la publicaziun. La cornisc musicala vëgn pitada da Jasmin Rives sön l’erpa.

Charing Golf Tour
Charing: le torné de golf tl’Alta Badia y tla Val de Puster, cun al zënter valur sozial, pasciun por le sport, gastronomia y tradiziuns dl post
Ai 2 y 3 d’agost vëgnel organisé l’evënt »Charing Golf Tour«, n apuntamënt caraterisé dala condivijiun de valurs soziai, dles pasciuns sportives, dla gastronomia y dles tradiziuns dl post. Le moto de Charing é chël de soghé a golf, se gode la contrada y les spezialités dl post y fá benefiziënza por l’Istitut Serafico de Assisi y por la »Lebenshilfe« de Südtirol. Por chësta ocajiun vëgnel tigní tratan trami i dis n torné de golf tl ciamp dl’Alta Badia y de Puster a 36 büjes. An pó soghé trami i dis, vigni de sön n ater ciamp da golf o ince ma un di dui dis. Pro la manifestaziun vëgnel organisé la sabeda na cëna ladina y la domënia na cëna gourmet cun la lotaria de benefiziënza y spezialités de Simone Cantafio, Andrea Irsara, Giancarlo Morelli, Claudio Sadler y Diego Crosara. Trames les sëres vëgn pre­sentades dala tota dla manifestaziun Petra Loreggian y Giovanni Vernia dl radio RDS, sön le tët dla ciasa de Copa dl Monn a La Ila. La manifestaziun »Charing« é la com­binaziun perfeta danter devertimënt, gastro­nomia y benefizënza. Info y iscriziuns sön www.charing.events

Ilominaziun dl Sassongher
Le crëp simbol de Corvara gnará ilominé ai 8 d’agost, cun acompagnamënt musical dla Müjiga Calfosch-Corvara
En vëndres ai 8 de agost gnarál organisé a Corvara la tradizionala ilominaziun dl Sassongher, le crëp simbol dl paisc. 
La mani­festaziun mët man dales 20:45 y gnará daurida dal’entrada dla Müjiga Calfosch-Corvara fora por le zënter de Corvara cina pro paiun sön plaza de comun. Chiló tëgn spo la musiga n conzert cun melodies tra­dizionales mo ince toc plüp moderns y fora de val’ film. Deperpo pó i partezipanc ti ciaré al Sassongher, che gnará ilominé da lajössö da pert di Stüdafüch da Corvara y n valgügn mëmbri dl Aiüt Alpinisć Alta Badia. L’ilomi­naziun pó gní amirada diretamënter dal zënter de Corvara, che resta d’isté stlüt al trafich dales 18:00 ales 22:30. An podará ince amiré n cil da stëres y speré da odëi val’ stëra che toma. Sce al foss bur’ tëmp, vëgn l’ilominaziun desdita y le conzert dla musiga vëgn tigní te salf dles manifestaziuns.

Long River Rock Revolution 2025
Tosc éra indô tan inant y i podun se la conforté al conzert »Long River Rock Revolution«
En sabeda ai 9 de agost dales 20:00 se aspe­tel, tl salf dles ma­nifestaziuns Gio­vanni Costa a Lungiarü, na sëra plëna de musiga, tenjiun y ener­gia. Cater bands dla Val Badia porta sön paladina novités musicales, cun melodies uniches y sonns che trasmët sentimënc desvalis. La serada mët man cun la band »Chasing Rabbits«, che unësc te sües cianties deplü stii de musiga, pian ia impröma­dedöt dal psychedelic rock, hard rock, grunge y valch iade ince n’influ­ënza dal metal.
»The Füse« portará inant la sëra cun de sües cianties, realisades tl stil musical alternative stoner metal. »Überspannung« surantol la paladina cun cianties fora de so album nü, che afrontëia tema­tiches provocantes y scialdi scu­ta­des ia. La band lasciará aldí n stil musical definí sciöche NDH (Neue Deutsche Härte). Sonns dürs, scürs che trasmënt indere energia y forza.
Le conzert se stlüj jö cun la death metal band »Last Colony« de Badia, che sona n stil musical particolar y desfarënt. Al sará porchël na sëra dedicada dan­tadöt ala musiga rock, mo che lascia ince lerch ales melodies uniches y ai sonns particolars de vigni band. Dötes y düc é dër bel inviá da tó pert! 
L’entrada é debann!

L mond di sentimënc di mutons
Tl self dla Cassa Raiffeisen a S. Cristina vëniel metù a jì n referat n con’ dla emuzions di mëndri
Co pòssen pa capì y cum­panië i sentimënc de pitli mutons y mutans?
La Lia Gaia, deberieda cun l Cunsëi Furmazion S. Cristina, mët a jì n re­ferat y lauratuere per crì y dé respostes n con’ dl mond di sentimënc di plu pitli, n mierculdi ai 6 de agost dala 17:00 nchin la 19:00. La refe­rënta ie Linda Faconti, psicologa y cunsulënta de prim aiut emozional. Per plu nfur­mazions y iscrizions: 333 2096834 o info@linda-faconti.it.

Vites scundudes tla montes
La Galaria de Fìe, sun plaza de dlieja a Fìe, à l plajëi de nvië ala giaurida dla mostra de Wilhelm Senoner, n vënderdi ai 8 de agost dala 19:00
Tla storica Galaria de Fìe prejënta l artist Wilhelm Senoner na selezion de scultures y depënc, te chëi che l partësc lecorc, mprescions, pensieres y dejideres. La Dolomites à n pëis fundamentel: la figures se ascuend danter purons y parëis – l artist cunësc chisc crëps y la montes da pitl insù y duc si lecorc devënta ispirazion per si scultures y si strutures.
La natura ie la prutagunista prin­zipela de chësta mostra y l chiët ie n argumënt che vën for inò tematisà.
La mostra resterà davierta nchin ai 20 de agost, dal merdi nchin la sada dala 16:00–19:00 y de sada nce danmesdi, 10:00–12:00.

Mile ciüfs straordinars
Ai 5 d’agost dales 21:00 él sön paiun d’Al Plan na serada cun stories de guern, coraje y comunité danter Afghanistan y Südtirol
Sot al titul »Mile ciüfs straordinars« vëgnel metü a jí a Al Plan na serada danter Afghanistan y Südtirol, cun stories de ëres che ti tëgn bot ala violënza y verda cun coraje sura le dagní. La sëra mët man cun la testemonianza dl’Assoziaziun Revoluzionara dles Ëres Afganes (RAWA). An metará spo l’edl sön la violënza de jëne gonot ascognüda te nosta provinzia, cun l’intervënt dl »Centro d’Ascolto Anti­violenza GEA« da Balsan. 
Al zënter dla serada él na mësa torona olache al s’incunta poesia y ativism, impreja y sozial – liá dala crëta che unësc chi che ascuta sö y á le coraje da baié. La sëra vëgn stlüta jö cun n pice ritual coletif: la degustaziun dl tê »Il Fiore di Herat«, simbol dla incuntada y dla resistënza. La serada vëgn promoiüda dala Cooperativa Turistica Al Plan/San Martin, Pompadour, Costa Family Foundation y l’assoziaziun »Insieme si può«.

Cunzert dl’Urchestra Sonoton
L’Urchestra Sonoton Gherdëina, sot ala direzion de Alex Designori, nvieia de cuer al cunzert da d’instà n sada ai 9 de agost dala 20:30 y n dumënia ai 10 de agost dala 18:00 sun Plaza de Chemun de Sëlva
Chësc cunzert zelebrea l’eleganza y l ritm di bai dla mujiga tlassica. L sarà danter l auter da audì bai sinfonics de Sergei Rachmaninoff, pec de mujiga scialdi cunesciui coche la Peer Gynt Suite I de Edvard Grieg o l balet dl spacacuces (Der Nussknacker) de Peter Ilyich Tchaikovsky y truepa d’autra cumposizions.
Chertes de ntreda ie da giapé pra la cassa da sëira, n sada dala 19:30 y n dumënia dala 17:30 inant. N possa nce apusté danora la chertes tres la plata Facebook o Instagram dl’Urche­stra Sonoton o tres l codesc QR da abiné sun i placac. I musizisć y la musizistes se ncunforta!