La Usc di Ladins

Na chindejina de retrac de Franz Dantone Pascalin é stac metui fora ló dal zenter Dòlaondes de Cianacei, n percors visif nasciù da na ciacolèda anter Daniela Perathoner del CdA de la SITC, sozietà patrona de la strutura, e Lorenzo Dezulian e Davide Baldrati. Belapontin l an passà l era stat metù fora a Trent la mostra del fotograf da Gries, prum de la Dolomites, e enlouta l é vegnù fora la pissèda de endrezèr via zeche de tèl ence te Fascia.

Chiò l’espojizion fotografica à ciapà l inom, per talian e ingleis, »L’acqua: un percorso tra le Dolomiti - Water: a path across the Dolomites« metuda fora jà dal scomenz de dezember. Enstadì l é stat l’inaudazion: Perathoner ge à dat l benvegnù ai prejenc, uzan fora coche la sozietà sie contenta de chesta ocajion e la ge à zedù la parola a Sabrina Rasom, diretora del Istitut cultural ladin, ent che à colaborà per endrezèr la mostra: »L archif de Dantone, tegnù su con anteveder da la familia Dezulian, à n valor archivistich e etnografich fondamental per duta la comunanza.«
L percors l é stat portà dant da Lorenzo Dezulian, patron del fon fotografich: »Aer n archif l é ence na responsabilità, vel dir saer l slarièr fora a na moda coerenta, zenza sutèr ite tel comerzièl. Dachelanvia l é nasciù chesta esposizion, na reflescion su l’èga. Stampèr i retrac l é de gran valor mascima te n temp che la fotografia la é asvelta e zenza valuta: con chest percors ge dajon n fon segnificat a chisc retrac che met dant na tematica, chela de l’èga, muie delicata aldidanché«.

De più su La Usc stampèda de en vender ai 8 de aost del 2025

 (Nicoletta Riz)