La Usc di Ladins

Do la metà de setember l é temp de desmonteèr. Se pur che la se abie deslabeà belebon en prescia, su la pizes più autes l à jà fiocà. Do l temp ciaut de chest istà l é temp de menèr l bestiam endò ju te val. Endèna che su per la monts, mascima de la Val de sora, à busià i schiapes de feides più gregn (vegnui adalèrch da utró), te val de sèn Nicolò la feides de Riccardo Zanet les é states sorì. Embendapò, proprio chisc dis pian pian l les à menèdes en ju de retorn a Poza. Sion jic a l domanèr fora.

Ne conteste de tia pascion?

Riccardo Zanet Gio stae ja Poza e é 18 egn. Da ca n pec de egn é tacà a arlevar bestiam, soraldut feide e ciaure. Chesta pascion la me é stata passada da la sor de mia giava, Iolanda, che la me contaa canche ere picol che enlauta a Poza i tegnia stala, desché la maor part de la jent. Jà da picol donca me é pascionà de bestie, dijon. Ic i aea la stala jun pont de Poza. Da me en fora, la pascion par le bestie tu l’as daite, no me é mai enteressà nia de jiar a videojeghes e coscì.

Co èste scomenzà via?

É tacà a lurar sot de autra jent: é fat par dir na stagion con n schiap de feide sun Bufaure e te Val Jumela. Chel an é emparà la maor part de le robe: canche se scomenza a aer n bon numer de bestie, descheche é ades gio, ge vel vardar de se rangiar, de no cogner chiamar l dotor dute le oute, ence parcheche l é na speisa. Al scomenz é comprà le prume doi ciaure forin Fiem e dapodò ogne an semper de più, fin canche ades n é beleche na cincantina. Canche no saee amò far daldut l mestier chiamae l dotor ogne outa che na bestia la stajea mal, ades é emparà a le cojir se le se taa, a le medejinar e le far partorir. Mingol le basi de chel che serf saer far canche se à bestie.

Podede lejer duta l'intervista su La Usc 37 de en vender ai 27 de setember. L sfoi é da poder comprèr ence te la boteighes dai sfoes.   (Nicoletta Riz)