La Usc di Ladins

La crousc su la ponta de L Om ades la varda endò ju, bela staifa e dreta, la sgalizea slancenta contra l ciel. Chisc dis passé la ponta de L Om se à scuert co la pruma neif solvia del uton e i colores maraveousc de chesta sajon ge fasc da cornisc. L era da trei egn che chela crousc era via per jabas e da presciapech n an che doi volontadives da Soraga se aea metù tel ciaf de jir su a la meter endo en pe. L’idea é pontada via Michele Decrestina e Luca Zulian che ne à dit metù en consaputa de la é stata, ma dant de ve contar de chesta ultima impresa, aon volù jir en do tel temp e verjer la crigna di recorc de la Crousc su L Om.

Son jita te Valfreida per rejonar con Harald De Pellegrini del refuge Flora Alpina, fi de Lino, cognosciù dut intorn per soa gran pascion per la mont, n om lurent e semper desponibol a didar, l soul vif amò anter i protagonisć de chesta storia.
»La pruma crousc su L Om é stata metuda su i prumes egn ’60, l’idea era stata de mie pare Lino e de Bepi Pellegrin de Zach - me conta Harald. La era de banda, duta piena e enceben che la fosse stata tacada coi tratoi la se à spacà ju, fazile dal peis. Del 1984 sion jic su a meter su n’autra crousc: eraane gio, che aee 12 egn, mie fradel Erwin che n aea 10, con mie pare Lino, Paolo Pellegrin de Zach e Gianni Savio da Falciade.

»Che fajone pa de la crousc su L Om? La tiron su!«

Ai recorc de Harald se jonta apede chi de Luca Zulian. »Dut l é nasciù al scomenz da na idea de n grop de amisc: Bepi de Zach, mie barba don Giovanni Rossi, Lino de Valfreida e Giorgio De Gregori da Trent, i medemi che à endrezà ence la Pizolada. La crousc che i à portà su enveze del ’84 la era stata fata a Bergamo da n ghest faure del Miralago. L era da trei egn che la era rebaltada e no se la vedea più su. La se à crepà d’invern, la se à empienì de neif e l vent l l’à parada ju, no i ge aea metù i contravenc. Na dì Michele (Decrestina, ndr) me à dit: »Che fajone pa de la crousc su L Om?« E gio ge é dit: »La meton su!»

Dut l articol su La Usc stampèda de en vender ai 3 de otober del 2025  (Monica Cigolla)