La Usc di Ladins

»Sorafora la barieres: istruzions per na mobilità più giusta e sostegnibola« l era l titol de la scontrèda endrezèda dal Comun General de Fascia, en colaborazion con la sociazion AsTrID odv de Trent, tel chèder de la Setemèna del Azet. En lunesc ai 29 de setember, te sala de Consei de Comun de Sèn Jan, l é stat chiamà ite en particolèr i referenc e l personal di Ofizies Tecnics di Comuns e chi che se cruzia de projetazion per fèr na esperienza pratica e jir sorafora la barieres architetoniches te nesc paijes.

Dantfora Cipriana Tomaselli del Ofize Servijes sozio-assistenzièi del Comun General de Fascia à portà l salut dijan che chesta scontrèda era stata pissèda jà con Mirella Florian, canche la era amò Conseiera de procura al sozièl, e che ades tel chèder de la Setemèna del Azet la ciapa amò maor segnificat per moscèr la desvalivanzes, che l é ence cheles che ge empedesc a la persones de viver al miec de sia potenzialitèdes. L ombolt de Comun de Sèn Jan Giulio Florian à jontà apede che chel de la barieres architetoniches l é n argoment emportant ajache canche se fèsc la projetazion de infrastrutures se cognessa tegnir cont di besegnes de la persones con desabilitèdes e fèr a na vida da tor demez duc i empedimenc.

Per capir miec e proèr en pruma persona a se mever con la cariega da rodes, l president de AsTrID Andrea Facchinelli, ence el su la cariega do n azident che l à abù con la roda, e l vizepresident Andrea Tevini che l é verc, à compagnà i tecnics de Comun a jir fora su la strèdes del paisc de Poza.

Dut l articol su La Usc stampèda de en vender ai 3 de otober del 2025  (Monica Cigolla)