La Usc di Ladins

Va inant a Ciampedel l empegn de l’Aministrazion per meter a post l bosserlait de Comun, n intervent de gran besegn ence percheche la condotes che pert no ge arsegurea scialdi l’èga te ogne cèsa de paisc. Col ombolt Alessandro Bernard fajon n bilanz de la situazion e estra apede ge aon domanà fora se i à vèlch projet per chel che vèrda la èga pazes a vegnir ju de Duron.

Che lurieres siede do che portède inant su la condotes da l’èga de Comun?

Sobito do la litazions aon scomenzà a lurèr per meter a post i toc più veies. L é stat refat nef dut l toch de bosserlait che da la Coprativa rua fin al crousdevia de strèda Roma, olache l é l semafer. Con chesta setemèna cognessa peèr via i lurieres per meter a post la condotes che dal semafer va su do strèda Roma, envers Col da Faé. N toch a l’outa cognon vardèr de meter a post. Aon tout via l’èga ence te vèlch toch de paisc per meter ju usciaes per poder serèr fora toc de bosserlait spezifics, zenza cogner serèr fora ogne outa dut l paisc coscita da scechèr manco possibol.

Che lurier aede da fèr per prum?

I tecnizi, a chi che se aon out, i ne à dit che fosse bon cont cambièr più o manco l 5% de la rei ogne an, coscita da ruèr a ge fèr l giro te vint egn. Chesta perzentuèla ti egn passé no la é stata touta en conscidrazion percheche l era de autra speises e projec e dachelanvia ades aon belebon da meter a post. No die che te chisc cinch egn vardaron de fèr l lurier che ge volessa fèr te diesc o chinesc egn, ma chest l é nosc obietif. Se trata de mestieres sot tera e che l sentadin no l veit, ma l é intervenc che aon de besegn de fèr. La operes de presa les peta fora n muie de èga e i resservares de Pozates e Fraines i é assà gregn per ge fèr ruèr èga a dut l Comun, aon problemes su la rei de paisc. L é sozedù, te vèlch moment del an, che no ruèa l’èga te la pèrt auta de paisc e chest no pel più sozeder. A comedèr i toc veies che pert e col sparagn de èga da la perdites, se ruarà a valivèr la disperscion de èga che l é ades.

Duta l'intervista su La Usc stampèda de en vender ai 3 de otober del 2025  (Nicoletta Riz)