La Usc di Ladins

Se tegnir arcedé col cef ence canche se à lascià ló de studièr da n trat l é emportant no demò per la cognoscenzes personèles ma ence per la sanità. Per chest semper più jent se n prevèl de la sacotanta proponetes che vegn endrezà sul teritorie.
La Università per la jent de età e del Temp ledech l é una de chestes. Se trata de n servije dedicà a l’educazion per la jent de età che, de gra a n projet culturèl struturà, l sporc percorsc formatives pissé per chi che vel na ocajion de crescimonia personèla. L obietif l é favorir na comprenjion più fona de la realtà, viver con più consaputa, smaorèr chel che se sà e per cognoscer miec argomenc storics, umanistics, scientifics, economics, giuridics e tropes de etres.

L Comun de Sèn Jan e la Fondazion Franco Demarchi de Trent met endò a jir ence chest an de scola la neva proponeta de corsc de l’Università e i fèsc a saer che l é avert la iscrizions. La lezions vegnarà fates dai 15 de otober ai 25 de mèrz del 2026 de mercol e de vender da les 15:00 a les 17:00. L pian de studie perveit l ensegnament de letradura con i autores de anchecondì de nonzech, ambient e natura, religions e desvalivanzes religiouses, storia del post, storia del Trentin, compagnament al scout de la musega, sanità e bonstèr, l sentadin e la istituzions, zitadinanza solidala e èrt del post.
Vegn fat ence n cors de ginastica dai 3 de november ai 20 de oril, de lunesc e de jebia da les 9 a les 10. Per tor pèrt a l’Università per la jent de età e del Temp ledech no ge vel aer nesciun titol de amiscion o de studie, duc chenc per se scriver ite, bèsta aer fat i 35 egn. Donca segur na bela ocajion per se tegnir informé, agiorné, per studièr materies che no se à mai fat, per se sproèr con zeche da nef, per verjer l cef.

L é temp per se scriver ite enscin ai 8 de otober, bèsta se oujer al ofize de canzelaria del Comun de Sèn Jan.