La Usc di Ladins

L era demò vèlch nigola tel ciel en domenia ai 19 de otober, canche dedant al Comun de Sèn Jan raprejentanc de aministrazions, istituzions e gropes, ensema con n muie de jent, se à binà per ge dèr l benvegnù a don Mario Bravin, chiamà a doventèr l pèster de duta Fascia tolan su, apede a la parochies de Dèlba, Cianacei e Ciampedel, ence cheles de Mazin, Pera, Poza, Vich e Soraga.
I confalons de la 5 parochies con n gran numer de servidores e l raprejentant del Piscop don Albino Dell’Eva con preves de Moena e de Fiem à compagnà don Mario fin sun gejia de Poza, ensema coi ombolc e i comitac parochiai, la Musega de Poza, l’Union di Ladins, i Scizeres e na raprejentanza de l’autra Museghes e Gropes de folclor, la Crousc Checena, i Alpins, l’ADVSP, la Forzes del orden e n gran numer de Studafech del distret de Fascia, de chel che don Mario endèna l é amo vize ispetor.
A i spetèr, ge fèr strèda sun sagrà e ge dèr l prum azet l era i bec de la catechesi e dedant gejia l salut de la Musega de Poza col In ladin, i Scizeres con la salva e l onor de la bandiera, e dapò la paroles de benvegnù de Giulio Florian ence a inom di etres ombolc e de la vizeprocuradora Lara Battisti.
Te la gejia bela fornida e strapiena de jent don Albino, aldò di ric pervedui da la Gejia per la consegna de la parochies, l à let l decret de nomina del Piscop e l ge à consegnà a don Mario la chieves e i etres simboi per la benediscion di fidei, l batum, la senta de zelebrazion, l pergol e l utèr. Con de bela paroles l à rengrazià don Mario percheche l à obedì, l à dit che ampò per el, che se à fat fascian anter i fascegn, e ence per i veies e i neves parochiegn, l é bel che l aesse podù restèr amò chiò te val.

Se pel lejer dut su La Usc nr 41 dai 24 de otober, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.



 (Lucia Gross)