La Usc di Ladins

Cunzert dl’Urchestra Haydn
I Jëuni de Mujiga Gherdëina nvieia al cunzert dl’Urchestra Haydn: n juebia ai 23 de utober dala 20:00 tla Cësa di Cungresc a Urtijëi
Per la lingia di cunzerc di Jëuni de Mujiga de Gherdëina ne pòssel nia mancë chël dl’ur­chestra Haydn de Trënt y Bulsan, chëst ann sot ala bachëta de Vanessa Benelli Mosell.
Sun l prugram saràl chëst ann la Ouvertüre cun »Il barbiere di Siviglia« de Gioachino Rossini. La jirà inant cun la Cuarta Sinfonia de Beethoven tl b-dur, op. 60 y la Sesta Sin­fonia de Franz Schubert tl c-dur, D. 589.
La chertes de ntreda ie da giapé pra la cassa y danora tl ufize dla Lia per l Turism de Urtijëi.

»I scioldi é tla banca«
Chësc é le titul dl teater che la Uniun Teater La Pli porta sön paladina chësc altonn. Premiera ai 2 de novëmber
La Uniun Teater La Pli inviëia bel al teater da rí »I scioldi é tla banca«, metü tl ladin da Franz Rigo. Gustl Clement é n slosser de pro­fesciun cun la gran pasciun da jí a arobé fora banches. Le de de so 40. compliagn röiel indere, do avëi indô n iade rot sö n tresor, te na situaziun che podess ti roviné süa cariera. Te chësc momënt de prigo dál joramënt da ne rumpí ite, por 40 agn alalungia, te degüna banca y da n’aziché degun tresor, sce al é bun da ti sciampé ala porjun. I s’inviun dër bel da gní a fá testimoni. Jobleri é Tone Palfrader, Sabine Facchini, Magdalena Konrater, Gabriel Stuffer, Alfons Facchini, Paul Ellecosta, Elmar Winkler, Franz Rigo, Alex Daverda y Martin Rigo. La regia é de Anna Palfrader. La premiera cun renfrësch é la domënia ai 2.11. dales 15:00, les atres rapresentaziuns é ai 8.11 dales 20:00, ai 9.11. dales 15:00, ai 14 y 15.11. dales 20:00, te ciasa dles uniuns. Prenotaziuns al 338 9316650 o ince Whatsapp (dales 17:00 ales 22:00).

Daurida dla mostra »Odlada.Blick.Sguardo«
En sabeda, ai 18 d’otober dales 16:15 él tl Barjënt dla Ciasa de Palsa la daurida dla mostra de fotografies de Elias Frontull
La mostra »Odlada.Blick.Sguardo« é le resultat dl laur de Elias Frontull da Longega, che á tratan i ultims dui istá fat practicum tla Ciasa de Palsa Ojöp Frëinademetz. »Te mi tëmp lëde me plejel danterater da fá fotografies. Insciö él sté por me na bela ocajiun da fá chësc proiet y da me dé jö cun les ’Odlades’ di berbesc y dles mëdes«, insciö Frontull. 
Lapró él gnü invié la jënt de döta la Val Badia da se dé jö cun la tematica dla odlada dla porsona y da ti dé lerch ai pinsiers tres la parora scrita. Insciö sarál ince da odëi na esposiziun de rimes, poesies y pinsiers. 
Le program prevëiga le salüt da pert dl pre­sidënt Giovanni Mischí, pinsiers de Chri­stian Ferdigg, parores dl autur Elias Frontull y la letöra de rimes. La cornisc musicala vëgn pitada da »Les Marions«.

»Audide, audide…«
L Tublà da Nives nvieia ala prejentazion dl Portal Ladin y mostra dla cianties ladines, n juebia ai 23 d’utober dala 20.00
La mujiga ie tla cultura dla valedes ladines da for incà na pert drët mpurtanta y possa mustré su na tradizion che va de reviers ti ani y che flurësc nce ncueicundì.
La mostra »Audide, audide...«, metuda a jì n culaurazion cun la Union di Ladins de Gher­dëina, uel mustré su chësta gran richëza culturela, ti dajan la lerch ai tesć dla cianties che n puderà nce se scuté su jan ite sun l Portal Ladin.
La prejentazion vën fata dala grupa de lëur cun Isabella Mussner, Sofia Stuflesser, Aaron Demez y Laurin Moroder.
L sarà da audì cianties de »tel Tipes« y dla grupa Vidalong.
Orares de giaurida: 15.00–18.00. De lunesc y l di de Unissant iel stlut.

Tomades, no dilan!
Ai 24 d’otober domisdé vëgnel tigní tl pice salf dl Istitut Ladin a San Martin n referat olache al gnará baié de prevenziun dales tomades y ince de aiüt do les tomades
La Portina por l’assistënza y cura organisëia en vëndres ai 24 d’otober, dales 14:30 ales 16:30, tl pice salf dl Istitut Ladin »Micurá de Rü« a San Martin de Tor, na incuntada dal tema »To­mades, no dilan!« Referën­tes é les infermieres Karin Tavella y Maria Maggiori. 
Al gnará mostré co fá da prevení les tomades, co lové sö do na tomada da susc y cun manco sforz, y co daidé na porsona tomada da lové sö cun manco sforz. 
Düc é dër bel inviá.

Edema dla Sanité te Mareo
Dai 20 ai 23 d’otober vëgnel tigní a Al Plan, La Pli y Rina la 22ejima ediziun, An baiará de desturbs alimentars, de karate, de sanité dai dënz y ince de esperiënzes dlungia la mort
I Consëis de formaziun d’Al Plan, La Pli y Rina cun la Crusc Blancia Mareo, inviëia dër bel ala 22ejima ediziun dl’Edema dla Sanité, che vëgn tignida dai 20 ai 23 d’otober. Söl program él cater serades, cun na mësa torona y referac.
Desturbs dl’alimentaziun
L’edema vëgn daurida le lönesc ai 20 d’otober dales 20:00, tl salf dla Cassa Raiffeisen d’Al Plan, olache al vëgn metü l’azënt sön i desturbs dl’alimentaziun. Al baiará la pedagoga y psicoterapeuta Raffaella Vanzetta – coordi­nadëssa dl zënter de competënza por desturbs dl’alimentaziun INFES, Michela Cincelli – la uma de na porsona ato­cada, cun la testemo­nianza direta de na jona de 25 agn. La moderaziun é de Jasmin Ferdigg.
Karate do
En mertesc ai 21 d’oto­­­ber dales 20:00 vára inant te Ciasa dles uniuns a La Pli, cun na sëra dal titul »Karate Do – Imparé por la vita«. Les parores »Karate Do« ó dí le »Tru dla man öta«. Le referënt dla serada é le maester de ka­rate Arnold Rofner, che mostrará sö che le karate é cotan deplü co n sport o na ert de com­batimënt.
La sanité di dënz
De sanité di dënz nen vára spo tla terza se­rada, söl program le mercui ai 22 d’otober dales 20:00, te salf dles manifestaziuns da Rina. Sot al titul »Nach­hal­tige Zahn­gesund­heit« – sanité di dënz che döra tl tëmp, ba­iará la do­turia dai dënz Patrizia Bauer.
Esperiënzes dlungia la mort
L’ultima serada nes condüj indô a Al Plan, plü avisa la jöbia ai 23 d’otober dales 20:00, te salf dla Raiffeisen. Le dotur Marco Pizzi­nini baiará dl tema »Tla löm danter vita y mort – ci che porso­­nes cun­ta de chëstes espe­riënzes dlungia la mort«. Ince te chë­sta serada él preodü teste­monian­zes dire­tes de porso­nes che les á viüdes.
L’entrada a dötes les serades é debann. Al ne vá nia debojëgn da s’anunzié danfora.

L’aministraziun de sostëgn
Sëra d’informaziun sön l’aministraziun de sostëgn, en lönesc ai 20 d’otober dales 20:00, tl bar Barjënt dla Ciasa de Palsa a San Martin
Te chësta serada d’informaziun, che vëgn tignida por todësch, gnarál splighé de ci che ara se trata, sce l’ami­nistraziun de sostëgn é por val’ y sciöche al é le decurs dla prozedöra por na inciaria d’aministradú de sostëgn. An jará ite ti compic y dovëis plü importanc dl aministradú de sostëgn, y mostré sö che che á n ütl da chësta forma de söstëgn iuridich. Implü gnarál presenté l’Assoziaziun por l’Aministraziun de sostëgn y sües ativités. 
Le referënt dla serada é le dr. Alex Kemenater, che é dal 2023 incá volontariamënter atif tl’Assozia­ziun por l’aministraziun de sostëgn. Dötes y düc é bel inviá da tó pert.