La Usc di Ladins

Da passa dui agn incá vëgnel bombardé tla Strisciora de Gaza, olache le popul palestinesc patësc ormai n massacher. Al vëgn baié de 70 mile morc, de chi che la majera pert é mituns y jogn. Aiüc vëgn impedis, strotöres sanitares é gnüdes bombardades cun orenté. Danter les porsones che orô jí a daidé, toca ince le dotur Alaa Qutum. Nasciü dl 1969 tla Palestina, él rové tla Talia dl 1989, por rajuns de stüde. Do la laurea de medejina tla université de Bologna él rové te Südtirol y vir incö cun süa familia a Al Plan de Mareo. Da Mareo vál edema por edema a Kempten fora en Paiern, olache al é primar de chirurgia sön l’os dal spiné pro la clinica "Askeplios". Le neurochirurgh d’Al Plan é bele sté deplü iadi a Gaza por dé so contribut. L’ultim iade dêl jí jö ala fin de messé, olache al ess messü fá 15 operaziuns a mituns. Mo so iade s’á rové tl aeroport de Tel Aviv, olache les autorités israelianes ne l’á nia lascé inant: "Tö os jí a daidé mituns palestinesc? Chiló ne passeste nia!", é stada la resposta. Nos un albü l’ocajiun da baié cun le dotur Qutum, che nes á cunté chësta storia da incrësce; al nes dij la süa sön chësc conflit y ince ci che al nen pënsa dl Tratat de pesc sotescrit amez otober a Sharm El–Sheik.

La intervista ciafëise t’La Usc di Ladins di 24 d’otober  (Intervista: Pablo Palfrader)