La Usc di Ladins

"I edli é le spidl dl’anima", vëgnel dit. Ai é na finestra daverta che lascia cuché ite plü sot tles emoziuns de na porsona, te sü sentimënc, te süa moda d’ester, y che dij alüsc deplü co n gröm de parores. Chësc án sëgn la poscibilité da descurí te Ciasa de palsa a San Martin de Tor, olache al é gnü daurí la sabeda passada la mostra "Odlada.Blick.Sguardo", olache le jonn Elias Frontull da Longega á orü tigní toch les odlades de berbesc y mëdes. Chi che al incuntâ de por de tratan sü dui agn de practicum, chi che al á imparé bel plan da conësce, cun chi che al á costruí de por de n raport tres plü strënt y personal. Le resultat é na mostra olache al é gnü metü fora 30 retrac a blanch y fosch. Edli che mostra can la buna löna y ligrëza, can seriosité y tristëza, alüsc ince odlades pordüdes. Al é odlades che te atoca, da ti ciaré plü sot, che te armöi, che te mët da ponsé.

Deplü sön la daurida y la mostra podëise lí t’La Usc di Ladins di 24 d’otober  (pablo)