La Usc di Ladins

Nadel te na scatula dai ciauzei
Nce chëst ann vëniel metù a jì l’azion per ti purté mpue de legrëza a mutons de paejes pueresc. N possa dé ju i pachetli dai 10 nchin ai 17 nuvëmber
Te Gherdëina vëniel fat pea pra chësta azion bele da truep ani incà y trueps sà bele nëut y fej pea uni ann. Mpo uelen fé al savëi for inò de chësta scu­­menciadiva. Mutons y mutans che se ncunforta sun chësta scincundes nen iel for assé. Pervia dla ujinanza al’Europa dl Est unirà la scin­cundes mandedes te chisc raions. N possa mplenì una o nce plu scatules cun de pitla scincundes, scrijan sun na eticheta sce l ie per n mut o na muta y per ciuna età: 2-4 ani, 5-9 ani o 10-14 ani. Adatà fóssel a les mplenì cun n me­scedoz danter roba per sc­ola, de igiena, velch da guant, ma zeche da se tripé ie for bënudù. Sun i julantins o sot a www.weihnachten-im-schuhkarton.org iel da abiné cunsëies n chësc cont. I pachetli pòssen dé ju dai 10 nchin ai 17 de nuvëmber tla trëi biblioteches de Gherdëina, ulache l ie nce da garat scatules uetes per chi che ne n’ëssa nia una ada­teda. Tla Val Badia puderàn dé ju i pachetli a La Ila pra Flatscher Alma, (Garni Am­bria), tel. 333 6769105.

Prevení stress y burnout
En vëndres ai 17 d’otober él n referat a San Martin de Tor, cun le psicologh Anton Huber
La Portina por l’assistënza y la cura mët a jí le referat por todësch sura le tema »Stress und Burnout vorbeugen: Strategien und Tipps für pflegende Angehörige«. Le referat vëgn tigní en vëndres ai 17 d’otober dales 15:00 ales 16:30, tl salf di stödafüch a San Martin de Tor. Referënt é Anton Huber, psicologh dl ospedal da Bornech. Düc é dër bel inviá.

Spanish Brass & Matthias Höfs
I Jëuni de Mujiga Gherdëina nvieia al cunzert di Spanish Brass & Matthias Höfs n juebia ai 16 de utober dala 20:00 tla Cësa di Cungresc a Urtijëi
Da plu de 35 ani incà ie l Spanish Brass un di ensembles de strumënc a fla plu mpurtanc a livel de mujiga nternaziunela. L cuintet, nasciù l ann 1989, ie cunesciù coche furmazion dinamica, bon de crië tendënzes nueves sibe de mujiga tlassica che nce cuntemporana, desmustran na gran flescibltà stilistica.
L cunzert arà n bel prugram y danterite su­neràl l solist de trumbëta Matthias Höfs.
Chertes danora giàpen pra l ufize dla Lia dl Turism de Urtijëi, 0471 777600. L sarà mesun cumpré na cherta soziela che vel per duc 10 i cunzerc. Granc: 100,00 €, Jëuni dai 14 ai 26 ani: 60,00 €. 
Cumpran na cherta soziela giàpen leprò na cherta debant per un n cunzert. Priesc singul: Granc: 20,00 €; jëuni da 14 ai 26 ani: 12,00 €.

Marcià di libri adurvei de Segra Sacun
Coche l ie bele tradizion, meterà la trëi biblioteches publiches dla valeda – San Durich, Tresl Gruber y O. v. Wolkenstein – nce chëst ann a jì l marcià di libri adurvei de Segra Sacun
I libri tëuc ora dala biblioteches – ajache danejei o nia plu atuei – y chëi dunei dai privac, unirà vëndui a 1 € per liber. I scioldi che vën trac ite unirà pona inò dac ora per l bën dla trëi biblioteches.
L marcià di libri ie a Urtijëi tla Cësa di Cungresc Luis Trenker dan l ufize dla Lia dl Turism y l scumëncia n lunesc ai 13 de utober dala 8 daduman nchin la 6 da sëira. N merdi ai 14 de utober saràl daviert dala 8 ala 12 danmesdì y dala 2 ala 6 da sëira, n mierculdi ai 15 de utober dala 8 ala 12 danmesdì.
La trëi biblioteches San Durich de Urtijëi, Tresl Gruber de S. Cristina y Oswald von Wol­kenstein de Sëlva se ncunforta sun vosc unì!

Nibl n Tiera – Ketty Gobbo
L Circolo–Lia Mostra d’Ert nvieia ala giaurida dla mostra ai 17 de utober dala 20:00 tl self dla mostres dla Lia Mostra d’Ert
»Nibl n tiera« ie na mostra njenieda ca aposta dala scultëura Ketty Gobbo per la lerch dl Circolo. L’artista à tëut ispirazion dal mond che nëus on ntëurvia.
Tl prim fova si mprescion dl’estetica dl luech scialdi sterscia. L’atmosfera nëubla da culëur, ie cureda a puntin y à na bona cualità d’ert. L cheder se muda debota sce n ti cëla da de plu pertes. La raprejentazion ne n’ie nia plu superfiziela ma l ie n lëur dur y cuncret, da formes stares y funzioneles.
La nstalazion ie penseda per fé pensé do al cuntrast danter chësta doi vijions.
La mostra resterà davierta nchin ai 9 de nuvëmber, merdi – vënderdi: 16:00-19:00, sada y dumënia: 10:00-12:00 y 16:00-19:00. De lunesc iel stlut.

L cunicio de peza
La grupa Teater Sëlva nvieia a la reprejentazions dl pez de teater da rì »L cunicio de peza« de Daniel Stenmans. Regia y traduzion tl gherdëina de Igor Demetz
Te n hotel se ancóntel d’uni sort de persunajes che fej pië via na cumedia che ne fina plu: n miena che la patrona dl hotel ebe mazà si uem; si purtier fej dla dutes per la cundané. Na cunlauradëura de na zaita de viages analisea defin dut cie che l hotel pieta zënza che deguni ne vënie al savëi. 
N ël uel se tò la vita, ma pona se namuréiel de na jëuna maduranta che ie n vacanza tl hotel. N per, che ie n luna de miel, se strita y se ujina pervia dla nuet de noza y trëi lasarons ie tl lëur de rumpì ite. Tl medem mumënt uel una dla polizai pië l »boss« de na grupa criminela. Y ala fin, nen iel pa mo na assassina che se tol dant de tò y jì defin l »boss«? Y l cunicio pa?
La premiera ie n sada ai 11 de utober dala 20:30 tla Cësa de Cultura de Sëlva. Daldò saràl mo cin’ reprejentazions: ai 14., 17., 22. y 25 de utober dala 20:30, y ai 19.10. dala 17:00. Chertes danora pòssen apusté cherdan su tl ufize de Turism de Sëlva, tel. 0471 777900.

Unghënc cun gras de salverjina
Ala descurida dla medejina naturala. Co podunse pa trá fora le gras de salverjina, le conservé y l’adoré por fins de medejina o de cura? Ai 15 de novëmber él n curs a Badia
Na resposta a chësta domanda ciafon pro le curs cun Barbara Hoflacher – iagra y esperta, che vëgn tigní ai 15 de no­vëmber dales 9:00 ales 17:00, tl local di iagri a Badia. Al gnará mostré co trá fora le gras y co le lauré sö por fá garaté na medejina de ciasa efiziënta, sciöche por ejëmpl unghënt por desturbs musco­lars o cuntra le me ales lisöres. Tl prisc de iscriziun él ince laite la marëna de salverjina arjignada ca dai iagri de Badia. Informaziuns y iscriziuns cina ai 15 d’otober pro Paul Valentin al numer de telefon 335 7489634. Le curs vëgn tigní por todësch. Organisaziun: Uniun Iagri Badia, en colaboraziun cun le Consëi de formaziun Badia.

La Scola sporc lezions debant
L projet de la Sociazion »Le Muse e le Dolomiti« se ouc ai bec e la bezes dai 6 egn en su che vel se goder col ciantèr e spilenèr
La scola interregionèla de ciantia e teater ‘Le Muse e le Dolomiti’ aur na neva senta te Fascia: apede a chela de Moena vegnarà fat lezions ence ló da la Ciasa de Noscia Jent a Poza. Te chesta scola i bec e la bezes no empèra demò a ciantèr lirica e fèr teater ma ence a se cognoscer miec anter de ic e con i studenc de l’autra valèdes e coscita nasc de neva amicizies e colaborazion. 
Perché pa tor pèrt a la lezions de la scola interregionèla? Perché ciantèr e fèr teater l é san, ge fèsc a l’ènema, se empèra a creèr en squadra, vegn sport na formazion de auta calità, se pel tor pèrt a concorsc e spetacoi e se se got. Per fèr cognoscer miec l’oferta for­mativa e artistica via per dut l meis de otober la scola aur la sentes con lezions debant per duc i bec e la bezes dai 6 egn en su. Te la senta de Moena vegn fat lezion de mèrtesc domesdì e chela de Poza sarà averta na dì da dezider aldò del besegn de chi che se scrif ite. Per tor pèrt a la lezions no l é de besegn de aer jà cognoscenzes de musega: pel proèr duc chi che à estro de se goder tras l ciantèr e l spilenèr ensema. Duta la informazions se pel les troèr sul sito www.musedolomiti.it opura podede chiamèr al 342 9147711