La Usc di Ladins

Piates de storia vivuda e piata biences amò da scriver se à enterzà te la bela festa de cedean per i 70 egn de l’Union di Ladins de Fascia en domenia ai 19 de otober. Do la messa ofizièda a Poza da don Mario Bravin, che te chesta ocajion à tout su ofizialmenter ence la parochies de la Val de sot la festa é jita inant a La Gran Ciasa a Soraga olache l era raprejentanc zivii, melitares e istituzionèi, de la Scola con l sorastant Federico Corradini, di Comuns de Fascia con l ombolt de Soraga Valerio Pederiva, la vizeombolta de Moena Cristina Donei e l’assessora a la cultura de Sèn Jan Mirella Florian, del Comun General de Fascia, del Istitut Cultural Ladin, de la Union Generela di Ladins dla Dolomites, de l’Union di Ladins de Gherdena con la presidenta Sofia Stuflesser, la storica Luciana Palla da Fodom, apede ai conseieres da ades e di egn passé.
De chisc 70 egn piens de scomenzadives, de traverc arjonc, de ensomesc, ma ence de traverc mencé à rejonà te sie intervent l president de l’Union di Ladins de Fascia Fernando Brunel, che l à metù l azent soraldut sul »besegn de tegnir su l lengaz ladin, che l cognessa viventèr ogne moment, e del doer de nesc raprejentanc politics de ge dèr valor ai deric de la comunanza ladina del Sela e no creèr spartijons: i à l doer morèl de scutèr su porum de dut la Unions, che te chisc 70 egn e più les à endrezà e tras lurà al ben di ladins«.

N moment da comozion e de recorc l é stat resservà ai cater fondadores de l’Union di Ladins de Fascia, metuda su con at ofizièl ai 19 de mé del 1955: sun paladina l é stat chiamà su e rengrazià con n picol don i descendenc del notèr Giovanni Rizzi, de don Massimiliano Mazzel, del giudize Giacomo Jellici e del dotor Simonin Sommariva.
N gran don per l’Union l é stat la prejenza del nef piovan don Mario Bravin e di etres preves che, do l moment convivial endrezà dai Comitac parochiai a Poza, é rué a portèr sie salut a La Gran Ciasa, n bel segn de vejinanza dassen aprijià. Descheche autertant aprijià l é stat l bel servije, ascort e profescional, de La Lum de Roisc con Piercarlo Lorenz e dut sie staff che à fornì su con gran cura la sala coi colores ladins e à endrezà na bona cena, con la torta e adertura n cocktail pissà e creà aposta per l’Union, atenzions che ge à fat gran gust. Do la cena la festa é jita inant fin tèrt con la musega de I Pazedins.

De più, con tropes retrac, su La Usc nr 41 dai 24 de otober, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.


 (Monica Cigolla)