La Usc di Ladins

L’èrt del circo l é n mescedoz de emozion e tecnica, de marevea e snait, ma ence de fisica. Perché pa l diablo l stèsc en equilibrie sul fil demò canche l śira? Co mudei i percorsc de ciapie e anie, aldò de coche i vegn trac per aria? Él possibol spieghèr i cunsć di jogolieres a na vida sorida e percacenta, che se rue a entener te dut l mond? 
»Jocalo« l é la neva mostra-laboratorie endrezèda da la Scola Ladina, metuda a jir dai studenc e dozenc de Fascia per empeèr neva lums su la marevees e i jeghes de jogolieres e funamboi e con chela de portèr dant valguna anter la leges fisiches che regola l univers très sia gustegola aplicazions sotite i tendons da circo. 
En mercol ai 11 de mèrz te sala mostres del Liceo artistich de Sèn Jan l é stat avert l nef alestiment “da circo”, pien de colores e matitèdes, projetà e realisà dai studenc de la classes 3LSA del Liceo scientifich de Sèn Jan e 4D del Liceo Ulisse Dini de Pisa, tel chèder de na fradaa scientifica anter i doi istituc.
La mostra Jocalo resta averta enscin al prum de oril, via per l’aisciuda la vegnarà metuda fora ence a Pisa, tel paisc de Rango e te la zità de Trent. De messèl la ruarà endò te Fascia e, col endrez de la Coprativa sozièla Inout, la vegnarà metuda dant con sacotanta neves te scola populèra de Vich.

Podede lejer dut su La Usc dai 20 de mèrz da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)



 (Thomas Zulian)