La Usc di Ladins

“Ciun dëssi pa tò? Nude, love, invisible, tropical …”. Cun l prutagonist Peter, dut melsegur y pesimënt, dan nautomat dai presservatifs scumëncia la cumedia romantica, che la lia dl Teater de Urtijëi à purtà dant chisc dis tla Cësa di Cungresc a Urtijëi. Ciun presservatif dëssel pa śën tò per si “date” cun Lara? Dovia àudel la ujes de duta la pertes dl sé - chëla romantica, chëla raziunela, chëla rebela y chëla pasciunela - che rejona nsëuralauter y se dij de contra. Y dancà iel ël, Peter dut mpatussà dan chël automat, che ne sà plu co la pië. Co dëssel pa fé per ti fé a scusa a duc y dantaldut per se n giapé su una nsnuet?

La prima de chësc pez da rì dal titul “Wahnsinn ein Kopfkino”, scrit dal presidënt dla lia dl Teater de Urtijëi Patrick Perathoner, ie stata n mierculdi dl’ena passeda. L fova n pez uriginel, purtà dant cun gran pascion dai atëures Renate Senoner tl rodul de Lara y Rudi Insam te chël de si “date” Peter. Sun paladina fòvel nce mo i atëures che reprejentova la ujes desfrëntes tl cë di doi prutagonisć: la ujes raziuneles de Martina Holzknecht y Martin “Buldy” Moroder, la ujes pasciuneles de Heidi Rabanser y Moritz Ploner, la ujes romatiches de Nadia Moroder y Matteo Schenk y la ujes che dij de contra de Marie Mahlknecht y Jonas Moroder. Per chisc ultims doi fòvel l prim iede che i à fat pea coche atëures pra n pez de teater y la à butà. L ie bel a udëi che l nen ie nce de jëuni che vën do.

Elisabeth Kostner

L articul tla edizion atuela de La Usc di Ladins.