La Usc di Ladins

Por la 32ejima ediziun dla Sellaronda Skimarathon s’á incunté passa mile atlec do la vëta dl start a Corvara, olache la gran bisca de sportifs é piada ia, en vëndres ai 20 de merz dales 18:00. I 550 pers che á partezipé ala gara dl jí cun les pels, é rová adalerch da bëgn 23 naziuns. Iniann é la sfidada stada emozionanta y scombatüda, cun deplü concorëntes y concorënc de alt livel.

Da pert di ëi n’é le per trentin de Davide Magnini y Federico Nicolini nia sté da bate. I capiuns dla ediziun dl 2025 s’á porté a ciasa la devënta sön le percurs cun 42 km y 2.700 m de deslivel, che ai á stlüt jö te n tëmp de 2 ores y 59 menüc. Por secundi á passé fora le travert Alex Oberbacher de Gherdëna y le compagn Roncobello William Boffelli da Bergamo, cun n tëmp de de 3 ores y 2 menüc. Plü tardí é sté le per franzej de Anselme Damevin y Samuel Equy, rové al travert 7 menüc plü tert che i pröms. 
Da pert feminila s’á porté a ciasa la devënta le per talian de Noemi Junod y Ilaria Veronese, cun n tëmp de 3 ores y 41 menüc. Do da plü de 10 menüc á arjunt le travert sciöche secundes Dimitra Teocharis y Corinna Ghirardi, te 3 ores y 52 menüc. Al terzo post é rové le per cun la svizera Victoria Kreuzer y la svedeja Tove Alexan­dersson, 17 menüc plü tardies dles davagnadësses. 
Tla categoria di pers moscedá á l’atleta da La Ila Debora Agreiter deboriada a Stefan Fuchs arjunt le pröm post en classifica, cun n tëmp de 3 ores y 54 menüc. N ater bel resultat por l’atleta badiota y le colegh Fuchs, che bele l’ann passé s’â porté a ciasa l’or.

Deplü resultac de sport ciafëise da lí tla ediziun nöia, publicada ai 27 de merz!