La Usc di Ladins

Gennaro Giudetti l à 36 egn e beleche mec l li à passé portan didament desche operator umanitarie te situazions senestres tel mond: da canche de 19 egn l à fat servije zivil internazionèl te l'Albania, no l à azetà l'idea de saer di orores del mond e no fèr nia. L é stat te la Colombia con Operazione Colomba, corp de pèsc de la Comunità Papa Giovanni XXIII, tel Kenya e dapò soraldut ti lesc en vera, tel Libano, Palestina, Siria, Afghanistan e etres. Con Medici Senza Frontiere l à tout pèrt a l'emergenza per l'ebola tel Congo e aldò de chest l é stat ence a Codogno per l Covid, ajache »se zachei à besegn de aiut no podon se utèr da l'autra, olache mai i sie«. De sia esperienza l é stat scrit tel liber »Con loro, come loro. Storie di donne e bambini in fuga«.
Ti ultimes egn l à lurà per l'ONU, co la FAO e con l'OMS; apontin con l'Organisazion Mondièla de la Sanità del 2025 l é stat a Gaza e sun chesta esperienza, la più tremenda che dutes, l à scrit l liber »Con i miei occhi. Quello che ho visto a Gaza« (editor Piemme) perché »nia de dut chel che é vedù te mia vita de operator pel esser metù a confront con l infern de Gaza, e l é besegn che de dut chest, che nea l'umanità, reste testimonianza ence tel davegnir«.

De Gaza l vegnarà a rejonèr te Fascia ai 8 de oril da les 20:30 te teater del oratorie de Poza. Se aur coscita na rassegna metuda a jir dal assessorat a la cultura del Comun de Sèn Jan ensema con la sociazion 'Liberi da dentro' per rejonèr de degnità, deric e sistem penitenziarie, che jirà inant  ai 17 de oril con la proiezion del film 'Ariaferma' e ai 8 de mé con 'Viaggio in Italia. La Corte Costituzionale nelle carceri'.

Podede lejer dut su La Usc dai 3 de oril da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)