La Usc di Ladins

Co éla nasciuda l'idea de fèr na publicazion su la botanica?
Nives Iori Ti egn passé tel rejonèr de piantes con Marco Detomas de Pantalion me é pissà che fossa stat bel publichèr vèlch sun chest e ge é fat la proponeta a l'Union. Sion peé via dal material de Marco e do aon tout ite ence Alberto Chiocchetti che l colaborèa con la Fondazion del Museo Zivich de Rorei per de ge dèr na impostazion più scientifica. Gé e Alberto sion jic inant con la enrescida linguistica e botanica e Marco à rencurà la pèrt su la piantes da medejina. Aon tacà del 2021 e aon fenì ades; aon metù ite duc i fitonimes che l é stat troà per fascian, presciapech 600 anter fiores, piantes, èlbres, foarees, cioscedes e bèrbes, tolan ite ence la variantes fonetiches.

Ge dijon develpai a Nives Iori per sie lurier e per l'intervista che podede lejer su La Usc dai 30 de oril.

Podarede descorir de autra curiositèdes, veder i bie retrac de Alberto Chiocchetti e ve proveder l liber a la prejentazion, en vender ai 8 de mé da mesa les 5 domesdì al Hotel Gran Mugon sun Tamion, olache dapò sarà ence na bona cercia enjignèda dal chef Stefano Ghetta.


 (Lucia Gross)