La Usc di Ladins

Mefodër t’La Usc di 24 d’aurí unse albü scrit dles intenziuns dl Comun de Mareo da organisé danü l’azes ala Val dai Tamersc. Cina ciamó él dagnora gnü trat ite n daz a Fodara Masaronn, tratan i mëisc da d’isté. La orenté ê chëra da sposté la stangia plü infora, atira sura le ciamp dal sport tla localité Ciamaor, y da fá paié l’azes vigni de, döt l’ann, de y nöt. Döt chësc meton sö n sistem automatich che lí les targhes di auti. Chësta dezijiun á trat sö bindebó de stöp, nia inultima cun i proprietars – chi che á grunc daite dala stangia y chi che á le grunt olache al gniss la stangia. Te chësc ultim caje él la Vijinanza d’Al Plan, patrona dl grunt de dötes les plazes da parché a Ciamaor. En mertesc s’á le comité dla Vijinanza presenté te Comun cun la proposta da lascé lauré fora deboriada n conzet che pormëtes da ester arjigná indortöra, y porchël sburlé la mudaziun dl azes al ann che vëgn. Ci che chësta proposta ó dí tla sostanza, ti unse damané al presidënt dla Vijinanza Horst Valentin. Al spliga che ara nen vára dantadöt da amplié la lerch por lascé jö i auti tla localité Ciamaor, p. ej. tolon ite la spersa sura les plazes che é bele, mo ince da cherié na striara – cis por paurs y patruns de grunc che á da lauré i terac – por passé dlungia stangia ia. Co che chësc conzet ciarará fora plü avisa gnarán alsavëi plü inant. Ci che i savun bele sëgn, é che l’azes ala Val dai Tamersc y Pederü restará n iade sciöche al é: ó dí cun la stangia a Fodara Masaronn, olache le daz gnará trat ite tratan i mëisc da d’isté, sambëgn cun i residënc che pó passé debann.  (pablo)