La Usc di Ladins

En domenia ai 17 de mé da le 10 da doman fin le 8 da sera se pel jir te la sala del Consei de Comun de Sèn Jan a litar per renovar l Comitat de gestion de l'ASUC per i 5 egn che vegn.
Pel litar duc i capifech de la Frazion de Poza, che en cajo i pel ence ge dar la delega a n component de soa familia, purché l sie de maor età.
Su la zedola se pel scriver su fin a cinch inomes de capifech de Poza, ma se racomana de meter semper apede al inom e al cognom ence l sorainom o la data de nasciuda, per schivar che en cajo de omonimia la stima vegne anulada.
Duc i 5 componenc del Comitat di ultimes 5 egn i se met endò a la leta, e l é: Bernardino Zulian de Cuz, Massimiliano Rasom de Rasum, Fernando Cincelli de Jina, Marco Locatin de Patron e Gabriele Detomas Anzol. Apede a chisc, autres cater à fat a saer te ofize che i fossa a la leta, l é Stefano Cincelli de Cibele, Mirko Gabrieli, Serena Bonetti e Fausto Lorenz de Jan; n podessa ence esser de autres, ajache duc i capifech à l derit de litar e de vegnir lité.


Podede lejer dut su La Usc stampèda, da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)