La Usc di Ladins

La Gejia no l é demò n frabicat, l é ence la comunanza cristiana che fora da chi mures laora, deida, prea e porta inant dì per dì i medemi valores che daite da chi mures la renforza vigni domenia.
Apontin la comunanza cristiana de Pera l é la protagonista del liber che l Consei Pastoral con Cesare Bernard à volù enjignar per recordar 50 egn de storia. L era i 27 de jugn del 1976 canche, do valch an de lurieres fac col didament de jent e istituzion, l Piscop Gottardi podea consacrar la gejia neva de Pera: na gejia grana, moderna, torona, che no se met en competizion con chela preziousa de Sèn Lorenz, ma la é bona de tor ite desché te n gran braciacol duta la comunanza. Chela comunanza che tel medemo an 1976 à volù che soa devozion posse se palesar a la val e al ciel e l'à fat su e portà con n lurier granac fin sun Sas de Pere da fech na crousc auta e staifa da meter al post de chele veie metude su jà dai egn '30 e che l temp aea dessatà.
De dut chest rejona l liber »Una chiesa accoglie. Una croce custodisce« olache apede a duc i segnificac e simboi liturgics de la gejia se pel troar ence na bela galeria de retrac sui momenc che la comunanza à vivù ensema, te gejia e sun Sas de Pere da fech. L liber vegn prejentà insnet, vender 29 de mé da les 20:30 te gejia de Pera, olache en domenia ai 31 da les 10:00 sarà messa grana e festa.

Podede lejer dut su La Usc stampèda dai 29 de mé da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)



 (LG)