La Usc di Ladins

Per entener l mond te chel che vif Franz Dantone Pascalin se cogn contèr na storia più grana, se lec tel quinto numer de la lingia de libres sui personajes de Fascia dac fora dal Istitut Cultural Ladin per la colana ‘Jent de Fascia’, apontin chel dedicà a chest feruscol om da Gries. Chela storia é stata contèda no demò sun chest codejel nef ma ence tras l spetacol de teater ‘Do l vièl del saer’ portà en scena da la compagnia ‘Trei carc de ora’ en vender ai 22 de mé su la paladina del kino de Cianacei e en jebia ai 28 a l’averta.
Che de Franz Dantone Pascalin, da duc cognosciù desche l prum fotograf, sie tant da contèr, l é stat per duc na descorida e na marevea. Na storia caleidoscopica che i atores David Dorich, Elia Dorich, Letizia Pezzei, Manuela Rasom, Gunther Pezzé, Ivano Favè, Luca Follador e Ilaria Chiocchetti (sie l é l test e la regia), à contà e spilenà.
La ritajon de Pascalin resta ti retrac de monc e jent, te sie paisc, tel inom de la strèda olache l é nasciù. L recordaron coscita, no demò desche l prum fotograf de Fascia, ma desche chel om da la longia bèrba biencia che travers sie aparat fotografich e si eies fons l à vardà dalonc, sorafora la seides, la ènemes e i stereotips, te n temp passà che se à avert a spalanch sul davegnir.


Podede lejer dut su La Usc dai 29 de mé da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Monica Cigolla)