La Usc di Ladins

La é de chisc dis la conferma che la Copa del Mond de schi de eles ruarà endodanef te Fascia ence del 2027. L Diretor generèl de la Fis Peter Gerdol ge à defat proponet a Fascia de se meter endò dant per endrezèr ai 9 e 10 de jené doi garejèdes asveltes che al scomenz era states assegnèdes a Sankt Anton te l’Austria. Libera l prum dì e superG la domenia. Na proponeta touta su con gran gaissa dal staff de l’ApT e de la sozietà Gregn Evenc che per la quarta outa à donca l met de endrezèr n event del zircuit maor de schi. La neva é ruèda a la radunanza de l’ApT de en jebia ai 28 de mé tras n video messaje del Diretor Gerdol e touta su con n gran batiman da duc i sozi te sala de La Gran Ciasa a Soraga. L’ofizialisazion de l’assegnazion e del calandèr definitif de Copa del Mond 2026-2027 é perveduda chisc dis che vegn, dai 8 ai 11 de jugn, al 57° Congres Internzionèl Fis a Belgrado. Simposie con confermarà ence l auter apuntament del zircuit maor per la disciplina del ski cross pervedù te Fascia, la Copa del Mond sun Sèn Pelegrin ai 22 e 23 de jené.

Gran sodesfazion é stata palesèda dal president de l’ApT Fausto Lorenz che à dit che »l obietif l é apontin chel de aer n post stabol tel calandèr del zircuit maor e canche la Fis à metù dant chesta proponeta no ge aon pissà su doi outes a dir de sci.« 
Gran gaissa e content ence per l Comitat Gregn Evenc con sie nef president Gianni Rasom. »Sion vertesc a se dèr endò ju, forc de na squadra e de n staff de aut livel, descheche aon semper desmostrà.«