La Usc di Ladins

Che suzes la Musega de Poza! Do esser ruada l an passà al Filmfestival de Trent con 'Troes de lum' e a la Maratona de la Dolomites, la banda vidada dal maester Giancarlo Dorich Cavei é stata enviada chest an al tour promozional per l Festival de Sanremo ruan per televijion te duta la Talia. 
Fosc apontin chesta esperienza per l festival de la ciantia ge à fat vegnir tal ciaf endò valch da nef per l Conzert d'aisciuda. L titol de chest an l era »Cianton«, che no vel dir sessaben che la Musega aesse chela de se n star te n piz: coi neves componenc su la paladina del tendon i à cognù jontar na fila de carieghe.
L program de chest an, prejentà a na vida dassen gustegola e feruscola, dut per ladin, da la 'più carina' Alessandra Catellani, l'à portà l publich te n viac anter i desvalives stii de ciantar, perché ciantar l é segn de legreza e l Conzert d'aisciuda, dedant a noscia jent, fasc l cher content. L maester Cavei per l'ocajion se à pissà ence de chiamar a se enterzar con el te la direzion no demò soa vize Vanessa Tomasi ma ence l maester Ivo Brigadoi, per ge mosciar ai sonadores vide de direzion desferente e emparar valch da nef.
I é peé via apontin da Sanremo, vidé da la maestra Vanessa, per ge far sentir a duc che 'Gianna' de Rino Gaetano, armonisada per ic da Valeriano Chiaravalle, i la sà sonar dalbon e a Trent no i aea demò fat mena.

Podede lejer dut su La Usc dai 29 de mé da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)