La Usc di Ladins

No l era na nigola en domenia ai 24 de mé, dì cernù chest an per l pelegrinaje di fidei de Fascia forin Baissiston. L era Pèsca de mé, festa che recorda l dì che l Spirit Sènt se à pojà sui Apostoi e l ge à dat la forza de doventèr pèstres de Crist portan sie messaje te dut l mond. L inom talian Pentecoste vegn dal grech antich 'pentekosté' (cincanteisem), ajache l vegn 50 dis do Pèsca. L lo à spiegà don Mario Bravin te la perdicia e l se à out en particolèr ai bec de la Pruma Comunion e a chi più gregn de la Creisema, chi de la Val de sora giusta confermé la sera dant. Ence anter i gregn fazile no duc saea e don Mario à recordà ence la reijes veiores de chest dì.
 (Lucia Gross)