La Usc di Ladins

La adunanza generala dla Union Generala di Ladins dla Dolomites ai 27 de mei 2026 tla Cësa di Ladins a Urtijëi ne à nia demé traté l cont consuntif dl 2025, ma ala à ence porté a lum n valgunes propostes interessantes per i Ladins.
Dantaldut àn recordé l Di dla Unité Ladina prevedù en sabeda ai 11 de messel 2026 a Corvara en ocajion di 80 agn da la manifestazion dl Sela tl 1946.
An se à tout dant de fé na rievocazion con desfileda che dess tematisé les ghiranzes di Ladins enlouta y encuoicundì. Tl medem temp vuélen porté dant de bones pratiches per la promozion dl ladin y impulsc per jì inant tl davegnì.
Ma al é ence vegnù tematisé les problematiches plu atuales di Ladins, scomencian da la prejenza ti media radiotelevisifs y online che ala và de renforzé dassen.
Con forza àn damané che al vegne metù en doura l reconesciment ofizial dla bandiera ladina y che an laore inant per l standard linguistich ladin te n sforz coletif dles istituzions y dles unions culturales.
Gran cruzies él per l smendriment dla cumpededa di Ladins y per les conseguenzes che chest à sun l proporz, che an messessa garantì ai Ladins altamo tla mesura dl 4,5%, scenò podessel vegnì a s’l dé na spirala scialdi negativa per duta la grupa linguistica.
Na autra gran priorité é garantì la movibelté soura i joufs dles Dolomites a duc i Ladins per ne spartì nia ciamò de plu nosta popolazion.
Prospetives positives per i Ladins se giaurissa sce la colaborazion anter les unions culturales y la Lia di Comuns Ladins portessa a la ativazion de n prozes de convergenza per arjonje l travert de na Comunanza Ladina dles Dolomites, che podessa deventé n referiment unitar per nostes valedes y sia popolazion.
I impulsc vegnus fora da la Adunanza Generala vegnirà studiés plu a fonz te n di de clausura dl Consei dla Union Generela di Ladins dla Dolomites per elaboré strategies operatives concretes per sia ativité di proscims temps.

Roland Verra, president dla Union Generela di Ladins dla Dolomites