La Usc di Ladins

La not anter sabeda e domenia i à sbregà ite te Caserma di Studafech de Vac via Pera e i à robà la pinza idraulica. »Se n aon ascort en lunesc bonora – ne à dit l Comandant Andrea Winterle – i à rot ite na fenestra del porton tedant, i é jic enter le machine e i cerì fora proprio la pinza idraulica e la troncatrice a bateria, art che i dora canche i va stroz a robar. Da le telecamere aon vedù che i era de doi con n capuc sul ciaf. Aon alertà i Carabinieres che i é do che fasc enrescide. Per i Studafech l é dassen n gran dan – ne à dit amò l Comandant – apede a ne aer danejà l porton i se à portà demez la pinza idraulica che la costa 30.000 euro. Cognaron se n enjignar n’autra ma no l é che 30 mile euro se i troe bele coscita. Aon semper n bel da far per proar a binar su i finanziamenc che serf per se comprar le art e i mesi e ades sozede ence de cheste. No ge volea, per endana cognaron far zenza...«

 (Monica Cigolla)