La Usc di Ladins

Ai 14 de messèl del 1946 i ladins se binèa sun Jouf de Sela per protestèr contra la spartijon e domanèr l recognosciment desche grop etnich. 80 egn do chest cedean é stat recordà ence te aula del Senat de la Republica. En mèrtesc ai 14 de messèl la senatora ladina Elena Testor à domanà la parola endèna la sentèda de assemblea nr 436 con n intervent per recordèr la Gran encontèda del 1946 e uzèr fora l empegn de tor su chela ritajon. »Ai 14 de messèl zelebron n cedean che no partegn demò a la storia di ladins ma a la storia de la Republica talièna e de sia democrazia – à dit la senatora Testor. Chela encontèda del 1946 l é stat un di prumes gregn momenc de partezipazion democratica de la Tèlia republichèna che era do che nascea. Chela femenes e chi omegn era jic sun Sela a pe no per revendichèr privileges ma per domanèr l recognosciment de chel che i era semper stac, n popul con sie lengaz, sia cultura, sia storia. L document aproà en chela dì raprejenta amò aldidanché na straordenèra testimonianza de maduranza politica: no l era na domana de spartijon ma na domana de unità. L era l’afermazion de n prinzipie che aldidanché recognoscion: la defendura de la mendranzes linguistiches fèsc doventèr più forta la democrazia percheche la democrazia é tant pù forta se la é bona de recognoscer duta la identitèdes che l é sun sie teritorie.

Chela vijion de acà 80 egn conserva amò aldidanché na gran atualità, ben segur la endesfida la é desvaliva dal 1946: cognon ge garantir ai joegn l derit de aer n davegnir e che i posse seghitèr a stèr te sia valèdes, che l lengaz posse seghitèr a vegnir rejonà te la families, durà te la aministrazions, ensegnà te la scoles, te la cultura, te la neva tecnologies. L doer de la politica l é creèr la condizions a na vida che identità e svilup posse jir inant ensema. Na Republica troa sia unità te la uniformità, te la capazità de valorisèr sia identitèdes desvalives. Chest l é l messaje che ne recorda la gran binèda sul Sela, l messaje de omegn e femenes che acà 80 egn é stac bogn de se tirèr su da la meseria lascèda da la vera per vardèr a n davegnir che poja sul respet, su la libertà e la degnità. A nos l doer de regoer chela ritajon con la medema pascion, la medema responsabilità, la medema fiduzia tel davegnir.« Testor à fenì fora sie intervent con la parola ladina 'Develpai'.

 (MCI)