La Usc di Ladins

Na maratona dedicada ala »Pax-Pesc« é stada chëra che s’á desfiré incö, domënia ai 5 de messé. Por la 39ejima ediziun dla Maratona dles Dolomites-Enel é piá ia dales 6:30 da doman a La Ila incër 8 mile partezipanc. Plü de 32 mile ê les porsones che ess ion fat para; na zifra che mostra le gran interes de partezipaziun ala manifestaziun de ziclism amatorial, oramai conesciüda lunc y lerch. Bëgn 78 é stades les nazionalités rapresentades tla competiziun da iniann, cun na porcentuala dl 50% dala Talia y l’ater mez da foradecá. La porcentuala feminila é ince aumentada, arjunjon le 12,5% te chësta ediziun.

Sön i trëi percursc oramai conesciüs s’á metü ala proa amaturs de vigni livel. Porimpó é stades les ziclistes y i ziclisć plü asvelc a dé maiú spetacul. A chisc y ai svilups dla gara án podü ti ciaré tla direta televisiva sön Rai2.

Pro i ëi y sön le percurs classich dla Maratona n’é Luca Cavallo nia sté da bate. Do la devënta dl ann passé s’ál metü a saul ince chëra de chësta ediziun, stlujon jö le percurs te 4 ores y 21 menüc. Dodesc menüc plü tert é rová al travert i dui atlec dal Belgio Koen Hendrickx y Vince Mattens.
Pro les ëres él sté la todëscia Janine Meyer che á deté lege, se meton da atira dancá y jon danfora por döta la dorada dla gara. Ara á stlüt jö le percurs classich te n tëmp de 4 ores y 59 menüc, meton sö le record feminil nü dla Maratona. Insciö á les talianes Martina Cavallo y Michela Santini messü s’acontenté dl secundo y dl terzo post.

Söl percurs mesan é le podium di ëi sté metü sö da Marco Ceriani, Matteo Fontanelli y Simone Pellizzeri, respetivamënter al pröm, secundo y terzo post, tratan che chël feminil á odü danfora Roberta Bussone al pröm post, Federica Cancellieri al secundo y Laura Šimenc al terzo.


Deplü da lí ciafëise tla ediziun che gnará publicada ai 10 de messé!