La Usc di Ladins

En domenia ai 12 de messèl l é stat ‘una de cheles giornèdes che a la vita ge dèsc valor, color e or’. I Ciamorces de Fasha e la comunanza se à strent dintorn a Giuseppe Dellantonio ‘Bepi Tasin’ che con sie 103 egn l é l menacrep più de età de la Tèlia.
La festa é stata endrezèda con cher e empegn dal president di Ciamorces Ivan Vian. Dantfora la messa grana te gejia de Ciampedel ofizièda da don Mario Bravin olache l é stat let ju ence la paroles de vejinanza del Piscop de Trent Lauro Tisi: »La fegura del menacrep l é na bela metafora del Vangele: el l é chel che no va da soul ma l se lea tel auter, l ge dèsc fiduzia, l custodesc la vita ti passajes più senestres – à scrit Monsegnor Tisi. La testimonianza de Bepi Tasin rejona a la vita de noscia comunanza. Aon de besegn de persones che ne deide a no perder la strèda, che tegne su la memoria e che verje troes neves.«
Do messa sun sagrà de gejia parenc, amisc, jent da mont spetèa Giuseppe Dellantonio con n gran batiman. El, amò con sia gran forza de spirit e de fisich, l é montà su la caroza, col didament de sie fi Paolo semper apedeju a l sostegnir. Apede el se à sentà ju ence Rina Chiocchetti del Moro e Almo Giambisi, etres doi menacrepes de età che à spartì con Bepi vita e troes da mont, e l president Ivan Vian.

Podede lejer dut su La Usc stampèda dai 17 de messèl da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Monica Cigolla)