La Usc di Ladins

Meter al zenter la persones ajache l valor più emportant resta l capital uman. Sun chest prinzipie, che da semper caraterisea la storia de la Coprativa de Fascia, l é stat lurà n an entriech per troèr la cordanza miora e sotscriver l nef Contrat Integratif Aziendal che arà regnèda fin ai 31 de dezember del 2029.

N investiment concret su la persones

La neva cordanza perveit n emportant investiment economich per la Coprativa che à dezidù de meter a la leta passa 217 mile euro en più respet ai smaoramenc jà recognosciui ti ultimes meisc travers l renovo del Contrat Coletif Nazionèl de Lurier e l Contrat Integratif Provinzièl.

»Se trata de n investiment che smaora l cost del personal de presciapech l 3,3% respet al ultim bilanz aproà del ejercizie serà su ai 30 de setember del 2025 e che l é più che la metà del utol net de la Coprativa che é de presciapech 400 mile euro« fèsc a saer la Coprativa.

Nesciuna tecnologia podarà mai tor l post del valor de la relazions

»Te chest moment storich olache la aziendes investesc semper de più te tecnologia, digitalisazion e inteligenza artifizièla, la Coprativa de Fascia é stolza de fèr chesta scelta strategica: seghitèr a investir soraldut su la persones – disc l Consei de Aministrazion. L’inovazion tecnologica raprejenta defat n strument fondamentèl per ge fèr front a la endesfides del davegnir, ma nesciuna tecnologia podarà mai tor l post del valor de la relazions, de la competenza, de l’acolienza e del spirit de servije che ogne dì caraterisea l lurier de la/i colaboradores de la Coprativa. Investir tel fator uman vel dir investir te la calità del servije, te la crescimonia profescionèla, tel bon endrez e donca te la capazità de la Coprativa de seghitèr a esser pont de referiment per la comunanza de Fascia.
L nef Contrat Integratif Aziendal ge é stat prejentà ai dependenc te na scontrèda en mèrtesc ai 21 de messèl. L responsabol de la ressorses umanes Stefano Defrancesco e l diretor David Pisoni ge à portà dant a na vida chièra ousc per ousc. La convinzion condividuda da duc l é che proprio la persones, con sia competenzes, sia gaissa e sie sens de partegnuda a la Coprativa, l é l fator prinzipal de suzes.

Dut l articol su La Usc stampèda de en vender ai 31 de messèl del 2026.

 (Monica Cigolla)