La é stata litèda dal Consei nef chiamà ite te sia pruma sentèda do la litazions en mercol ai 28 de otober. Fernando Brunel é stat nominà vizepresident, apede a Stefano Weiss
En mercol ai 28 de otober te Ciasa de la Moniaria se à troà l Consei nef de l’Union di Ladins de Fascia lità ai 9 e 12 de otober en ocajion de la Festa del Rengraziament. L Consei, che resta en cèria fin del 2029, tol ite 13 conseieres, apede ai 9 confermé l é ite ence trei neves: Andrea Weiss, Alison Prinoth e Manuela Davarda. La sentèda é stata averta da la diretora Nives Iori che, do la ratifica de la litazions, à rengrazià i conseieres per se aer metù a la leta e la ge à domanà a duc de se prejentèr.
Al orden del dì l era la litazions per la encèries pervedudes dal Statut, anter chestes ence chela del canzelist che va fora ensema al Consei. Duc à una ge à renovà la stima a Nives Iori.
À
tout la parola dapò Fernando Brunel che à metù en consaputa l Consei che, do 4 mandac da president, no l enten più se tor su chesta encèria per costions personèles e per ge lascèr post a zechei de etres e, vardan ence al numer de stimes de la litazion, l ge à domanà a Lucia Gross de se tor su la presidenza. Duc i conseieres ge à palesà a Gross gran stima e consens per dut chel che l’à fat te chisc egn per la sociazion, per sia dedizion e per sie spirit de idealism e volontariat. Lucia Gross à azetà la nomina e l’à dit che per ela raprejentèr l’Union l é n gran prestije. »Son segur contenta e stolza e rengrazie duc chi che me à dat la stima per ciapar su chesta enciaria, n muie emportanta per me, percheche n muie emportanta l é l’Union di Ladins – l’à dit. A dir l vera me pesimae n mingol ma é la segureza de aer semper apede nosc president da dant Fernando Brunel e l vize Stefano Weiss. Ensema con duta la squadra del Consei nef, del bel staff de l’Union e de La Usc de Fascia, speron de poder far jir inant chesta preziousa sociazion amò per n muie de egn dalvers.«
Gross à domanà de aer apede desche vizepresidenc Fernando Brunel, con l’encèria de rencurèr i raporc interladins e Stefano Weiss, per sia competenzes tecniches e aministratives.
L Consei ge à sport n fort rengraziament a Fernando Brunel per aer ret la sociazion te chisc 12 egn che à vedù ence momenc belebon senestres. La sentèda se à serà su con n moment convivial e i augures de bon lurier a la neva presidenta, al diretif e a dut l consei.
(Monica Cigolla)
