La Usc di Ladins

Da n lunesc ai 18 de mei dala 8.00 daduman inant uniràl dsarà l tòch de streda da Tluses ite, ajache l vën fat lëures de derturamënt te n tunel. N possa astilé ora sun la streda Prëner da Tluses nchin a Pruca, per unì pona basite te Gherdëina. L ie nce mesun furné da Pruca su de viers de Laion/Ried.
Sambën che chësc vel nce oravier: per jì a Tluses y Persenon cunvëniel riesc jì inant basora, da Puntives demez. Per jì a Laion ne n’iel al incontra degun problem, n possa furné da Puntives autora.

I lëures dura nchin a n merdi ai 28 de lugio.

Nce la curieres astiela ora
La curieres - mé chëles - dla linea 351 Urtijëi, Laion – Tluses –Persenon, astiela nscila ënghe ora, da n lunesc ai 18 de mei inant. La curieres jirà tres Untefings y Pruca, y ne se fërmerà nscila nia pra la Stazion dla Ferata a Tluses, Fundneyt y pra la stazion da ulache n va via a Albions.

Jëuf de Frea domesdì dsarà
Per gaujes de segurëza vëniel chisc dis nce mo inant dsarà la streda dl Jëuf de Frea, ma mé domesdì dala 13.00 inant, nchin la 21.00.

FOTO: Da n lunesc inant vàla de furné da Pruca ite y ora, nce per ruvé a y unì da Tluses y Persenon.

David Lardschneider