La Usc di Ladins

Michela Piazza va gën da mont su y iló se tòlela ultimamënter nce for pea zeche da dessenië. Canche la ruva te na luegia salvera o plu chieta, se sëntela ju, la tol ora si tea cun n valgun rispli, na plata blancia y la scumëncia a dessenië. »L me sà bel: i lëns, l’eghes, la natura nia ruineda dala persona. Canche conte de na tel luegia, pona diji for che iló fòvel sciche tl paravis«, à la artista de Urtijëi spiegà.

»Eden«, l paravis sun tiera, ie perchël nce l titul che la à cris ora per si prima mostra persunela, che ie da udëi chisc dis tla biblioteca »Tresl Gruber a Santa Cristina. L ie metui ora chedri dla artista cun motifs dla natura, n gran pert paesajes de nosta valeda, crëps y bòsc. Dlongia i chedri iel nce da liejer poejies dla scritëura Nadia Rungger.

Elisabeth Kostner

L articul tla edizion atuela de La Usc di Ladins.