L Cor y la Urchestra de dlieja de Urtijëi à festejà 100 ani da canche la lia ie unida metuda su. Per l'ucajion àn n sada sëira prejentà n liber nuef tla Cësa di Cungresc a Urtijëi
Dan avisa cënt ani, ai 28 de jené dl ann 1925, àn tenì tla cësa dl dirighënt da ntlëuta, bera Cristl Moroder, la prima senteda dl cunsëi dl Cor y dla Urchestra de dlieja de Urtijëi. Ma la storia dl cor va perdrët zeruch nchin ala fin dl 1700. Tl diare dl ugrister de Urtijëi y cumponist Matie Ploner iel ai 2 de mei dl 1799 scrit: "La mëssa solena, che é metù adum per Pasca, ie unida suneda cun duc i strumënc". N sà donca che da canche ël fova ugrister ne n'unìvel nia mé ciantà cianties scëmples te dlieja de Urtijëi, ma l univa bele purtà dant pec a plu ujes cun l acumpaniamënt dl orgun y de d'autri strumënc.
Nscila iel da liejer tl liber nuef "100 ani Cor y Urchestra de dlieja Urtijëi" scrit da Theodor Rifesser. Ël ie nstës stat dirighënt dl cor dal 1973 al 1997 y l ie da passa cincant'ani incà ugrister dla dlieja de Urtijëi. L liber ie unì prejentà n sada tla Cësa di Cungresc dan a n bel publich de cumpanies, parënc y cumëmbri da plu da giut. L se trata de n documënt de valor, te chël che Rifesser à abinà adum truep documënc, testemunianzes, fotografies y monce vel' registrazion.
Elisabeth Kostner
L articul tla edizion atuela de La Usc di Ladins.
