La Usc di Ladins

N lunesc de chëst'ena fova l troi de Triech a Santa Cristina śara. Chëi dla stredes dla Provinzia à messù mëter n segurëza l raion. Danter n juebia dl'ena passeda y n merdi de chëst'ena iel unì taià n 25 pëces, che manaciova de unì ju sun stradon. L nen fova danterite nce n cater o cinch de frec.
N lunesc danmesdì ie unì adalerch l joler per mené demez n valgun lëns a chëi che n ne ti ruvova nia permez. N merdi àn mo laurà inant cun l tractor y la binda y rumà su dut, coche nes à spiegà Patrick Kostner dl Servisc dla stredes dla Provinzia. N à laurà tl raion sot al troi de Triech, tl grunt dla Provinzia, ulache n à mo lascià la sienes y de mëndri lëns da pleces, che ne n'ie nia periculëusc. Mplu iel nce na rë, che garantësc la segurëza di auti che furnea do stradon ora.

Na situazion mpue ncompra per chi che va cun la curiera a S. Cristina ie gaujeda dai lëures tl rundel dlongia l hotel Post. Tlo vëniel metù ju roles nueves dal'ega, ajache la vedles ne fova nia plu bones de dlutì l'eghes blances y fosces dla streda Dursan, che n à da permò spartì.
Davia che la curieres ne possa nia plu raidé tl rundel, ne unirà la fermedes "Chemun" te tramedoi direzions nia plu servides nchin ai 28 de nuvëmber. Chi che se noza dla curiera y scana ite da chësta fermeda muessa śën danz jì mpue plu lonc a pe.

EK

L articul va inant tla edizion nueva de La Usc di Ladins de duman vënderdi ai 14 de nuvëmber.