La Usc di Ladins

La é n muie joena la neva bibliotecaria che à vent l concors metù fora dal Comun de Cianacei per tor l post de Daniele Verra. L’à inom Aurora Giuliani, la é da Soraga e mesa da Cianacei, clas 1997. L’à studià Scienzes de la formazion a Persenon e sobito do se aer laureà del 2022 l’à troà post te scola populèra. L’à ensegnà doi egn te la scola de Moena e de Vich e da chest an l’à ciapà l post te chela de Cianacei. La ensegna ingleis curicolar e veicolar te la materies de geografia, tecnologia e èrt de la fegura. L’à fat na esperienza te la Germania per studièr todesch ajache ge à semper sapù n muie bel se dèr ju coi lengac.

Aurora, co éla che te ès pissà che fèr l concors per la biblioteca de Cianacei?
"Me à semper piajù l mond di libres, é fat ence la tesi de laurea sui albi ilustré, é semper let n muie. Ma no aee mai coscidrà che aesse podù fèr ence la bibliotecaria fin canche l é vegnù fora l concors e é dit che l era na ocajion che no podee me lascèr sciampèr."

Podede lejer duta l'intervista su La Usc nr 43 dai 7 de november, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.




 (Monica Cigolla)