La Usc di Ladins

Nchin a set menuc dan la fin stajòvela mo 2 a 0 per l Gherdëina, ma ala fin dla finedes ne n'iel sautà ora nianca no un n pont per la Furies, a pensé che te chësta sajon dla Alps Hockey League òven nchinamò for fat ponc tl Pranives te Sëlva. Ma chëst'iede àla danz sciacà.

Tla partida de n sada ai 8 de nuvëmber contra l Kitzbühel à l Hc Gherdëina jugà n bel hockey. Puech dan l juech à l trainadëur Teppo Kivelä messù renunzië a Matteo Luisetti. Tla porta ti àl dat crëta al jëunn da tlo Paul Hofer, che à al scumenciamënt dl segondo tëmp fat n pitl miracul, tenian su na bela trata di averseres.

Tl 28ejim menut ie dut l Pranives levà su per festejé l prim gol dl Gherdëina cun Davide Schiavone. Mo dan la fin dl segondo tëmp ëssa la Furies pudù fé l 2 a 0, che ie pona garatà tl 43ejim menut sun na trata de Julian Senoner dala linia bruma, svieda te na maniera dezijiva da Adam Brady. Sacha Guimond ëssa daldò mo abù la ucajion de fé l 3 a 0 y stlù la partida, ma la ie jita de dut n auter viers. L manciova mé set menuc ala fin, canche l Kitzbühel à fat si prim gol cun Yoan Loshing, mé doi menuc do al 54ejim ài fat l 2 a 2 cun Niklas Wetzl y al 58ejim menuc iesi mo stac boni de vëncer cun l segondo gol de si jugadëur Loshing. Vel' da de tel ne se ëssen danz no plu aspità.

L Gherdëina possa bele duman ai 11 de nuvëmber se refé tl juech ora de cësa contra l Asiago.

EK