La Usc di Ladins

L scritëur, ciantautëur y regist Stefan Winkler ne n’à mei schivà l cuntat y nianca no la ndesfides. Y nscila se àl te si vita ancuntà y l à cunesciù d’uni sort de persones: dal Dalai Lama a Bill Clinton, da Jannik Sinner a Ina Regen.

Tl 2023, per realisé si film »Fal­cone-Borsellino: verneigen wir uns«, àl abù la puscibltà de ntervisté de plu persones che à da nfé cun la mafia. Tlo àl nce mparà a cunëscer l pruiet dla »Casa di Paolo«, na cësa te n ridl da n stlet inuem a Palermo. I mutons y la mutans de families pueres possa sté tlo via per l domesdì, canche i ne va nia a scola. Tlo vëniel cialà de ëi, i possa fé si duvieres y n ti scota su. Suvënz ne n’à i genitores nia dl’aurela de mëter verda de si mutons: i muessa jì a lauré per se davanië l viver, vel’ un ie nce te perjon. I mutons y i jëuni resta suvënz da sëui y sun streda manaci de unì trac pea dala mafia.
L ie perchël mpurtant, che i ebe na luegia ulache i posse jì, acioche i ne reste nia sun streda. Y chël ti pieta la »Casa di Paolo«. 

Elisabeth Kostner

L articul tla edizion atuela de La Usc di Ladins.