La Usc di Ladins

"L’ander de Conturines é l’ander plü vedl dles Alpes che an á daté cun metodes radiometriches". Chësc é le fazit che an á arjunt do agn y agn de stüdi sön chësta morvëia ascognüda al intern di crëps. Al ê l’ann 1987 che al é gnü ciafé sö chësc ander senté ite tl crëp a 2.775 metri d’altöra sura San Ciascian sö, cun laite desënes y desënes de osc, che ê – sciöche al é gnü fora – dla laurs ladina tlamada spo "Ursus ladinicus". Na domanda zentrala che é tres romagnüda daverta ê: tan vedl é pa pordërt chësc ander?
En vëndres dan otedé án finalmënter podü presenté na resposta: cun le sostëgn de n laboratore spezialisé tla Xi'an Jiaotong University dla Cina, ésera garatada da avëi por le pröm iade danman na dataziun radiometrica afidabla dles concreziuns da cialc che vëgn dant ite tl ander. Ara se trata de deponüdes de calzit che se forma te tëmps lungiscims, tres l’ega rica de minerai che gota jö tl ander. Danter i mürs dl Museum Archeologich da Balsan á le Museum Ladin invié a na conferënza stampa, olache al é gnü presenté i resultac dles inrescides, portades inant da n grup de esperc internazionai, sot la direziun dl professur Christoph Spötl y dla dra. Gabriella Koltai dl Istitut de Geologia dl’Université da Desproch.  (pablo)