La Usc di Ladins

I ún intervisté le diretur dl Ciamp pedagogich al intern dla Direziun provinziala Intendënza y cultura ladina Felix Ploner söl lauré y studié a ciasa. Al dij che les nezescités saltades fora dal efet coronavirus nes insëgna dër tröp y nes déura strades nöies por lauré efizientemënter y sparagné iadi y strades. Y la crëta ti colaboradus crësc.

La Usc: Bun de diretur Felix Ploner, olá sëise pa cun le laur?
Felix Ploner: "I sun al laur a La Pli de Mareo, en smartworking desche an dij aldedaincö. Lauré da ciasa te na beliscima contrada, le ci bel bröm, nia da dí, i sun impó fortuné."

Co vara pa da lauré a ciasa?
"Ara vá valgamia bun, i á i injins aladó y i pó fá tröp sön le computer. I sun en contat tresfora cun mies colaboradësses y colaboradus, porchël vá scialdi döt le laur inant. I sun destenüs fora te plü perts dla Ladinia y ince a Balsan. Dessigü mancia le contat personal fisich, mo i me inconforti indó a canche i jarun adöm al café."

Vara ince cun döta la familia che é iló, y i mituns che 'vá a scora' te ciasa?
"Nos a ciasa sunse de 5. I á n pü’ dötes les sorts de 'studënc'. Tanja fej l’université a Desproch, Alex la matura y Luca la profescionala. Tanja y Alex é zënza döta l’edema demez y sëgn á düc a ciasa ince leziuns online y chël scialdi da vigni ora, ince do cëna. Insciö adorunse impó tröp l’internet. A La Pli n’él nia la fira otica y insciö se arangiunse cun le fonin. An mëss mefo n pü’ partí la banda. Dessigü édl spo val’ d’ater da lauré y vire de 5 tl medemo apartamënt. Val’ iade vëgnera dessigü ince n pü’ strënta y vignun adora ince söa lerch privata y söa liberté y an n’é nia plü ausá da sté tan de tëmp adöm. Dantadöt mësson fá fora les cosses danü, che che stá te stüa, te ciasadafüch y insciö inant, por fortüna édl jö dessot ince la oma che á na lerch."

Liéde do deplü tla ediziun stampada de La Usc di Ladins!