La Usc di Ladins

Sciöche al ê bele gnü incundé da d’aisciöda, á la Diozeja de Balsan/Porsenú sëgn confermé de plü mudaziuns aministratives che é jüdes en forza cun le 1. de setëmber y atoca ince la Val Badia. La maiú reverda siur Klaus Sottsas, al momënt ploan d’Al Plan y vicar da La Pli, San Martin y Lungiarü. Ël ciafa sëgn ince la responsabilité aministrativa dles ploanies da Rina y Antermëia. Dailó él siur Paul Campei che vëgn deslié dala inciaria de ploan, mo restará inant atif sciöche curat, nia ma de Rina y Antermëia, mo por dötes les sis cöres dla bassa. Le medemo vel por siur Heinrich Perathoner, che ê cina ciamó curat d’Al Plan, La Pli, San Martin y Lungiarü. Ince ël jará a daidé fora lapró tles cöres da Rina y Antermëia.
Por daidé i proi y garantí inant la vita de ploania, á la Diozeja istituí i Teams Pastorai, che á le compit da "manajé" la ploania. Le pröm team tla valada é sté chël da San Ciascian de merz dl 2019. Cun setëmber vëgnel nominé ofizialmënter le team da San Martin de Tor cun a ce Rosmarie Crazzolara, sciöche ince le team da Antermëia cun a ce Silvia Schanung.
Dlungia chëstes nominaziuns n’él spo öna che reverda le canonicus y professur de Vedl Testamënt siur Ulrich Fistill: ël á ciafé lapró la inciaria da retur spiritual dla Academia Cusanus a Porsenú.  (pablo)