Le Consëi dl comun da Corvara é gnü cherdé ite por na sentada en mercui da doman. Sön l'ordin dl de êl trëi punc: la nomina dla comisciun de comun por le teritore y la contrada cun mandat dal 2021 cina le 2025, l'aprovaziun dl regolamënt comunal por ci che reverda l'afisciun de placac de reclam sön les tofles de comun y la conzesciun dles lercs tratan i marciá y spo la presentaziun dl proiet dla sënta nöia dles uniuns.
Tratan la sentada él gnü invié adalerch l'architët Albert Colz, nasciü a La Val, che á so stüde de architetöra a Balsan y che laora adöm cun so möt Armin. I dui architëc á presenté le proiet por la realisaziun dla sënta nöia dles uniuns, en particolar dl magazinn di stödafüch, dla sënta dl Aiüt Alpin y di locai por le proes dla Musiga y dl Cor de Dlijia. Al momënt é la pröma pert di laurs bele gnüda stlüta jö, cun la realisaziun de n garage sot tera ite che prevëiga 31 posć da parché. Le proiet é sëgn tla fasa de validaziun, spo rovarál te comun y messará gní aprové dal Consëi. Le Comun podará spo scrí fora y laurs y an se augüra da podëi mëte man da fá sö la sënta da d'altonn.
Deplü mëmbri dl Consëi odô incö por le pröm iade le proiet y al é salté fora val' dübe, en particolar por ci che reverda le tët dl frabicat.
Deplü podëise lí tla ediziun d'La Usc da incö, vëndres ai 2 de aurí.
(kp)
Corvara: presentada la sënta nöia dles uniuns
En mercui danmisdé s'á abiné le Consëi dl comun da Corvara. Ma trëi ê i punc sön l'ordin dl de, danterater ince la presentaziun dl proiet por la realisaziun dla sënta nöia dles uniuns
Galaria retrac
View the embedded image gallery online at:
https://www.lausc.it/valedes-ladines/val-badia/15270-corvara-presentada-la-senta-noeia-dles-uniuns#sigProIda96ec996d8
https://www.lausc.it/valedes-ladines/val-badia/15270-corvara-presentada-la-senta-noeia-dles-uniuns#sigProIda96ec996d8